تەمويرە
تەمويرە بژەن ئمشەو خەراوم
جوور کشتی ئەسیر گیژ گەرداۆم
تاسوو هامە دەس زەلان جەورەو
جووردار وەنێ لە بەرزی کەورەو
تەمويرە بژەن ناڵەێ گیانمی
قرچەێ چخچێلەێ ناو میلکانمی
تەمويرە بژن ڕاێ داخم ئمشەو
ڕاێ بێستوين پڕ ئاخم ئمشەو
بژەن تا وەسوو ڕاێ کزەێ جەرگە
ڕاێ پیرە دار ڕازی وە مەرگە
بژەن ساز دڵ ناسازە لەێرە
جوور زەخم چەقێاێ دەم وازە لەێرە
بژەن دریژە شەوار تا وەسوو
بناڵ لە سووزەم تا وە ڕووژ نوو
نە دووس نە دڵ سووز نە دی کەسێ مەن
خەمێ هەم هاتەو گیانم بێ دەنگ سەن
شان دامە لە شان تەنیاێ دیوارەو
دەس کیشم لە سەر زلف شەوارەو
قرچەێ گیانم تێەێ کوو لە بان کوو
وێنەێ پیرە دار لە بەرزی ئاسوو
تەمويرە بژەن ژان ها خەێاڵم
وێنەێ پرويسنەک شکێاێە باڵم
لەپ کوتێ هويرم گیان کەنێ گیانم
بنووڕ هويردەسە ئازای سقانم
لە قوڵ تیسەێ خەم تەنیام لەێ شارە
لیسک خوەر هاکوو؟ گشتێ شەوارە
کام دەس واز بکەێ دەروەچەیل شەو؟
لە نوو بوينیمن ئاسمان کەوو
ئێمە زندانی شەوق دووسیمن
کوشێاێ بێ نیشان زەوق دووسیمن
تەمويرە نەمەن نە دەس و نە دووس
لە ئێ تەنیایە هەر تۆ لە لام بووس
بنووڕ وە قوڵپەێ ئەسرەیل چەوم
بنووڕ وە گرپەێ بڵۆزەێ تەوم
بنووڕ وەێ گیانە تا سوو بارمە
وێنەێ باێەقوش قوقو کارمە
بژەن لە داخم بژەن لە دەردم
بژەن لە سووزەێ زمسان سەردم
بژەن تەمويرە تۆ زانی چوينم
لە ناو هسارەیل شێۆەێ دووس دوينم
وەرەو هەر جا کەم لە ئێ شەوارە
ترويسکەێ چەوێ لە دوير دیارە
لە داخێ خەوم تاسوو حەرامە
سويک زندان تێەریکی جامە
جەلال کووهی
