كل كلی كيشانه بنووڕ له ماڵ وه ماڵ و ده‌م وه ده‌م

چووپی وه ده‌س كه‌س نيه‌كه‌فێ، ها ده‌س راس ئاسمان

تا گه‌ر بنووڕن شيوه‌ی و مه‌سی چه‌وه‌يله‌ سه‌وزه‌گه‌ی

گشتی ده‌ون وه چوار په‌لا وه راس و چه‌پ و خوار و بان

زه‌ڕه‌ی عه‌زيز ده‌مچه‌وی تا كه‌فته تاريكان شه‌و

جوور هاتن گوڵه‌يل سوو، خه‌و له چه‌وه‌يل شه‌و په‌ڕان

په‌روانه‌گان گيج و ونگن، هه‌ر خڕ خوه‌ن و مه‌س بوون له‌لی

نيه‌زانن نه‌رگسه، رۆزه، گوڵباخيه يا ئه‌رغه‌وان

داخم وه ئی هه‌مكه‌ی دڵه، دڵی ئه‌رای دڵی ته‌پێد؟

خوه‌زيا بزانم ئاخری، بووده نسيو كاممان؟