هه‌ميشه و دايم جوور پاييز زه‌ردی

هه‌ی دڵ نامه‌ردی،هه‌ی دڵ نامه‌ردی

يه‌ی جار مه‌كه‌ری كار گه‌ن وا گه‌ن

يه‌ی جار بيده‌نگی جوور ته‌نيای ڕه‌وه‌ن

هه‌ر چی وتمه پيد بيل نه‌وی وه په‌ن

چِمای تيريگ بی،خوارديا وه سه‌ن

ئاخر خوه‌ميش جۆز به‌دنامان كه‌ردی

هه‌ی دڵ نامه‌ردی،هه‌ی دڵ نامه‌ردی

ساڵان بی هه‌ر جوور ڕووڵه‌يل ئايه‌م

خاسی مه‌كه‌رديام وه دڵ وه ده‌م

ڕازی مه‌يامو وه زيای و كه‌م

وه خياڵم نات نه‌هاتم بينه‌م

كول يانه تۆ وه سه‌رم هاوه‌ردی

هه‌ی دڵ نامه‌ردی،هه‌ی دڵ نامه‌ردی

كه‌ی من وه ديده گووشه‌ی چه‌و ديام

هه‌رگز وه واته‌ی ديده گووش نه‌يام

تا ئه‌و مه‌گيرست وه‌پی مه‌خه‌نيام

ئيسه وه ده‌سته‌ی مه‌ردمان جيام

ئه‌ك تويشِ شه‌ڕ بای يه‌ی كومه ده‌ردی

هه‌ی دڵ نامه‌ردی،هه‌ی دڵ نامه‌ردی

يه‌ك ‌يه‌ك ته‌ی كه‌رده‌م هه‌ر چی مه‌رامه‌ن

هه‌ر دويريم مه‌كرد هه‌ر چيش هه‌رامه‌ن

كردارم وه ڕوی به‌ند كه‌ڵامه‌ن

خاسم مه‌زانست هه‌ڵاڵش كامه‌ن

دی واز باره‌وه، وه وه‌يلان گه‌ردی

هه‌ی دڵ نامه‌ردی،هه‌ی دڵ نامه‌ردی

سه‌د دڵ مزگانی دام وه ئاوه‌ره‌ش

هه‌ر كه‌س ‌هه‌ر چی ويت كه‌ردم باوه‌ڕه‌ش

تا په‌ی گونا چی بردم زاوه‌ره‌ش

ئلتجاش كه‌رده‌م وه لای داوه‌ره‌ش

هانا من وه ڕای ناخاسان به‌ردی

هه‌ی دڵ نامه‌ردی،هه‌ی دڵ نامه‌ردی

من له ئاسمان تۆ زه‌مين جيت بی

من نه‌زرم مه‌كرد تۆ هه‌وه‌س پيت بی

هه‌م ويت گه‌نِد كرد هه‌م گه‌نی ڕيت بی

هه‌ر چيت به‌د مه‌كرد ته‌قسير ويت بی

من چه مه‌يلم بی تۆ چه هاوه‌ردی

هه‌ی دڵ نامه‌ردی،هه‌ی دڵ نامه‌ردی

دنيا مه‌گرديم په‌ی هه‌ر چی خاسه‌ن

به‌شم جيا كرد وه هه‌ر چی ڕاسه‌ن

وا شيوه‌ی ڕاسی كۆل مِ مه‌ناسه‌ن

كه‌يِم بياتا وه تۆم خه‌لاسه‌ن

تۆنت من مه‌ورد وه ڕای دڵسه‌ردی

هه‌ی دڵ نامه‌ردی،هه‌ی دڵ نامه‌ردی