ئافره‌ته ئاشكراكه‌ره‌گه‌ى جه‌نگ جه‌هانى دويه‌م ماڵئاوايى يه‌كجارى له دونيا كرد
شه‌فه‌ق نيوز/ مه‌رگ كووتايى وه ژيان"كلير هۆلينغۆرس"هاورد ك له‌ساڵ 1939 به‌رپابوين جه‌نگ جه‌هانى دويه‌م ئاشكرا كرد له‌وه‌ختيگ ك هيمان سه‌ره‌تاى كاركردنى بوى له يه‌كيگ له رووژنامه‌يل بريتانى.
له‌ى باوه‌ته‌و، ئاژانس روێته‌رز له زووان كاسى هلبۆرن ك ره‌فيق كلير هۆلينغۆرسه ئه‌را ماوه‌ى فيشتر له 20 ساڵ، له‌ڕى په‌يوه‌ندى ته‌له‌فۆنييه‌و له هۆنغ كۆنغه‌و خه‌وه‌ر مردن هۆلينغۆرس دا.
له ئاب 1939 هۆلينغۆرس ك ئه‌و وه‌خته ته‌مه‌نى 27 ساڵ بوى، وه‌ته‌نيا گه‌شت ئه‌را مه‌رزه‌يل ئه‌ڵمانى كرد و چه‌وى كه‌فته كاروان يه‌كه‌م له ده‌بابه‌يل ئه‌ڵمانى ك هاتيان وه‌ره‌و داگيركردن پۆڵه‌نداو سێ رووژ دوياى ئه‌وه يه‌كه‌مين كه‌سيگ بوى له‌بان ده‌سوه‌پيكردن جه‌نگ نويسا، نه‌ك ته‌نيا ئه‌را خوه‌نه‌واره‌يل رووژنامه‌ى ده‌يلى ته‌ليغراف، به‌ڵكوو ئه‌را ده‌سڵاته‌يل پۆڵه‌ندى و بريتانييش.
جى باسه، هۆلينغۆرس له ديمانه‌يگ وه‌ل رووژنامه‌ى ته‌ليغراف له‌ساڵ 2009، ئاشكراى ئى باسه كرد و وت: وه‌ختيگ بويچگ بويمه گه‌شت ئه‌را مه‌رز ئه‌ڵمانى كردمه ئه‌را چه‌وديرى په‌نابه‌ره‌يل و نابينايه‌يل و ئه‌وانه‌گ كه‌ڕ ولاڵ بوينه، وه‌لێ له‌وه‌خت وجوودم له‌ورا ئحساس وه جه‌نگ واقعى كردم.
