شه‌فه‌ق نيوز/ شماره‌ى ئه‌و كه‌سه‌يله‌ ك گيان له‌ده‌سدان له‌ ئه‌نجام تويشهاتن وه‌ په‌تاى وه‌رازه‌يل ك له‌يران بڵاو بويه‌سه‌و له‌ سبته‌مبه‌ر/ ئه‌يلول گوزه‌يشت تائيسه‌ ره‌سيه‌سه‌ 106 كه‌س.

له‌ى باوه‌ته‌و، ئاژانس هه‌واڵه‌يل فه‌رمى ئيران (ئيرنا) له‌ زووان حسێن عرفانيان سه‌رۆك به‌ش نه‌خوه‌شيه‌يل جيوازبوێ له‌ وه‌زاره‌ت ته‌ندروسى ئيرانى وت: له‌ هه‌فته‌ى گوزه‌يشت 3 هه‌زار و 354 كه‌س روێ له‌ نه‌خوه‌شخانه‌يل كردنه‌ وه‌ بوونه‌ى ده‌ركه‌فتن نيشانه‌يل ته‌نگه‌نه‌فه‌سى.

عرفانيان وت: دوياى تاقيكردن پزيشكى له‌بان ئه‌و نه‌خوه‌شه‌يله‌، ده‌ركه‌فتگه‌ ك 82 كه‌س له‌ليان تويش هاتنه‌ وه‌ په‌تاى وه‌رازه‌يل، ك دوياخر 7 له‌ليان گيان له‌ده‌سدانه‌.

يه‌يش له‌وه‌ختيگه‌ عه‌لى ره‌زا رئيسى جيگر وه‌زير ته‌ندروسى ئيرانى له‌ به‌ياننامه‌يگ له‌ 7 ديسه‌مبه‌ر ئى مانگه‌ ئاشكراى كرد شماره‌ى ئه‌و كه‌سه‌يله‌ ك گيان له‌ده‌سدانه‌ له‌ئه‌نجام تويشهاتن وه‌ په‌تاى وه‌رازه‌يل له‌ ئه‌يلول گوزه‌يشته‌و تائيسه‌ ره‌سيه‌سه‌ 81 كه‌س.

جى باسه‌، سه‌رچه‌وه‌يليگ ته‌ندروسى ئيرانى ئه‌وه‌ ده‌رخستن ك بڵاوبوينه‌وه‌ى ڤايرۆس ”H1N1 “ ك ئه‌دێده‌ هووكار په‌تاى وه‌رازه‌يل، له‌ى ماوه‌ى چه‌ن مانگ دوياخره‌ له‌چه‌ن شوونيگ جوور گوڵستان و مازنده‌ران و كرمان و ئه‌هواز و شوونه‌يل تر بڵاو بويه‌سه‌و.