شه‌فه‌ق نيوز/ دويه‌شه‌و ديره‌وه‌ختيگ ماڵ چه‌رمگ، ئاشكراى ئه‌وه‌ كرد ك دۆناڵد ترامپ سه‌رۆك ئه‌مريكا بڕيار دوياخستن مه‌سه‌له‌ێ جيوازكردن باڵوێزخانه‌ێ ئه‌مريكى ئه‌را قودس داگه‌، ئه‌ويش وه‌ ئه‌وه‌گ بڕياريگ له‌ى باوه‌ته‌و له‌ماوه‌ێ چه‌ن رووژيگ تر ئاينده‌ بيه‌ێد.

له‌ى باوه‌ته‌و، هوغان غيدلى قسه‌كه‌ر وه‌ناو ماڵ چه‌رمگ ئه‌را رووژنامه‌نويسه‌يل وت: ترامپ له‌ ماوه‌ى چه‌ن رووژيگ تر ئاينده‌ ئاشكراى ئه‌كا ئه‌گه‌ر ئمزاى بڕيار وسانن جيوازكردن باڵوێزخانه‌ى ئه‌مريكى بيه‌ێد له‌ ته‌ل ئه‌بيبه‌و ئه‌را قودس يا وه‌ چه‌واشه‌وه‌.

جى باسه‌، ئى ئاشكراكردنيشه‌ دوياى په‌يوه‌ندييگ له‌ ناونى ترامپ و ئيمانويل ماكرۆن سه‌رۆك فره‌نسى هات، ك له‌تى ماكرۆن نگه‌رانى ده‌رخست له‌ ئه‌گه‌ره‌يل دگانناين واشنتۆن وه‌ قودس جوور پايته‌خت ئه‌را ئسرائيل.