شه‌فه‌ق نيوز/ موسه‌نا ته‌ميمى پاريزگار دياله‌، ئاشكراى كرد وه‌ى نزيكه‌يله‌ ديداريگ وه‌ل مسته‌فا كازمى سه‌رۆك وه‌زيره‌يل ئه‌نجام ئه‌ياد له‌وه‌ر خستنه‌ڕوێ بڕيگ داواكارى په‌يوه‌س وه‌ پاريزگاگه‌و له‌وانه‌يش داواكارييگ له‌باره‌ى ئاڵشتكردن وه‌ڕيه‌وبه‌ره‌يليگ ك نزيكه‌ى 15 ساڵه‌ وه‌رده‌وامن له‌ پۆسته‌يليان و له‌لايه‌ن به‌شبه‌شايه‌تى حزبى و ده‌خاڵه‌ت نوێنه‌ره‌يله‌و پشتگيرى له‌ليان ئه‌كريه‌ێد و باس له‌وه‌يش كرد ئه‌و ئاڵشتكاريه‌يله‌ ئه‌وانه‌يش ئه‌گرێده‌و ك چوار ساڵ له‌ پۆسته‌يليان بوينه‌.

ته‌ميمى له‌ باسيگ ئه‌را ئاژانس شه‌فه‌ق نيوز ئه‌وه‌ ده‌رخست ك وه‌ى نزيكه‌يله‌ ديداريگ وه‌ل سه‌رۆك وه‌زيره‌يل ئه‌نجام ئه‌ياد و چه‌ن داواكارييگ پيشكه‌ش وه‌پى ئه‌كا و له‌ ديارترينيان ئاڵشتكردن وه‌ڕيه‌وبه‌ره‌يليگ ك نزيكه‌ى 10 - 15 ساڵ هانه‌ پۆسته‌يليان و له‌لايه‌ن حزبه‌يله‌وه‌ مقه‌يه‌تى له‌ليان ئه‌كريه‌ێد.

ته‌ميمى هه‌ميش وت: ئه‌و ئاڵشتكاريه‌يله‌ گشت وه‌ڕيه‌وبه‌ر ده‌زگايه‌يل ئه‌گرێده‌و ته‌نانه‌ت ئه‌وانه‌يش ك چوار ساڵ وه‌رده‌وام بوينه‌ له‌ پۆسته‌يليان، بجگه‌ ئه‌وانه‌يش ك دوسيه‌يليان ره‌وانه‌ى ده‌سه‌ى ده‌سپاكى كرياگه‌ له‌وه‌ر گه‌نده‌ڵى.