شه‌فه‌ق نيوز/ به‌ره‌ى ئنقاز و ته‌نميه‌، ره‌زامه‌نى ئوسامه‌ نوجێفى سه‌رۆكى له‌بان ئمتياز كه‌سه‌يل ده‌سوه‌سه‌كرياێ ره‌فحا هه‌ناى ك سه‌رۆك ئه‌نجومه‌ن نوێنه‌ره‌يل بويه‌ خسته‌ دروو.

به‌ره‌ى ناوبرياێ له‌ به‌ياننامه‌يگ ئه‌را ئاژانس شه‌فه‌ق نيوز وت: بيگومان ك ئوسامه‌ عه‌بدولعه‌زيز نوجێفى سه‌رۆك به‌ره‌گه‌ لايه‌نگرى مافه‌يل ره‌وا ئه‌كا ئه‌را چينه‌يل زه‌ره‌دمه‌ن له‌ رووڵه‌يل ملله‌ت عراقى له‌ساى رژيم وه‌رين يا ئيسه‌ى عراق له‌ بيسه‌روشوونكرياگه‌يل و ئه‌وانه‌گ چاره‌نويسيان نادياره‌، وه‌لێ ئه‌وه‌گ جى سرنجه‌ ئه‌وه‌سه‌ بڕيگ ميديايه‌يل وه‌كراگيرياى ره‌زامه‌نى نوجێفى خستنه‌سه‌ پاڵ ئمتياز ده‌سوه‌سه‌ركرياگه‌يل ره‌فحا هه‌ناى ك سه‌رۆك ئه‌نجومه‌ن نوێنه‌ره‌يل بويه‌، ك يه‌يش چه‌واشه‌ى راسيه‌يله‌و ناگونجيه‌يد وه‌ل نه‌ريت و ره‌فتاره‌يل و رۆڵ نوجێفى.

به‌ياننامه‌گه‌ يه‌يش ده‌رخست ك بنه‌ڕه‌ت ئه‌وانه‌گ ئه‌كه‌فنه‌ وه‌ر ئى ئمتيازه‌ وه‌ پيشنيازيگ بويه‌ له‌ ليژنه‌ى شه‌هيده‌يل و قوربانيه‌يل و زيندانيه‌يل سياسى ئه‌را پرووژه‌ياساى هه‌مواركردن يه‌كه‌م له‌ ياساى ده‌زگاى شه‌هيده‌يل ك له‌ وه‌زاره‌ت ده‌وڵه‌ت ئه‌را كاروبار ئه‌نجومه‌ن نوێنه‌ره‌يل پيشكه‌ش كرياگه‌ له‌ 25 نيسان 2013.