شەفەق نیوز/ دەسەی دارایی پاڕلەمانی، ئمڕوو سێشەممە، باسکرد ک حکومەت فیدڕاڵی مووچەی فەرمانبەرەیل ئەرا مانگ حوزەیران لە ئی هەفتە مەرەقەز کەێد.
ئەحمەد مزهر جبوری ئەندام دەسەگە ئەرا ئاژانس شەفەق نیوز وت: دویای واژو کردن سەرۆک کۆمار لەبان یاسای قەرزکردن ناوخۆیی و دەیشتی ئەرا پڕەوکردن پەککەفتنە داراییەگە له‌ ساڵ ٢٠٢٠ گشت چشتیگ ئامادەس ئەرا حکومەتەگە لە خەرجکردن مووچەی مانگ حوزەیران فەرمانبەرەیل.
وتیش؛ وەزارەت دارایی فەرمان داگە بانکەگان وە خەرجکردن مووچەی فەرمانبەرەیل لەی هەفتە، وەگورەی میکانزم وەکارهاوریاگ لەلایەن وەزارەت و دامەزراوەیل حکومەتی لەخەرجکردن مووچەی فەرمانبەرەیلیان.
پەرلەمان عراقی، رووژ چوارشەممە، پڕۆژەی یاسایگ واژو کرد ری دەێدە حکومەتەگە ئەرا قەرزکردن ناوخۆیی ودەیشتی ئەرا پڕەو کردن پەککەفتنە داراییەگە لە وڵاتەگە.
بەرهەم ساڵح سەرۆک کۆمار، رووژ پەنجشەممە، واژوی یاسای سپۆنسەرکردن پەککەفتنە داراییەگە کرد ئەرا ساڵ ٢٠٢٠ ، وئی یاسا ری دەێدە حکومەتەگە لە قەرزکردن ٥ ملیار دۆلار و ١٥ ترلیۆن دینار ئەرا پڕەوکردن بۆشاییە داراییەگە ئەرا ساڵ ٢٠٢٠ .
حکومەت عراقی سەختی کیشێد ئەرا دابینکردن مووچەی فەرمانبەرەیل وئەو خەرجەیل وەکارهاوردنی لەوەر داوەزین نرخ نەفت وەهووکار په‌تای کۆڕۆنا، ک کەرتەیل گه‌ورایگ لەئابووری جهان پەکخست، و جەخت وڵاتەگە هابان داهات فروشتن نەفت خام ئەرا ٩٥ لە سەد لە خەرج دەوڵەتەگە.