شه‌فه‌ق نيوز/ ئه‌ندامه‌يليگ له‌ ئه‌نجومه‌ن نوێنه‌ره‌يل له‌بان پاريزگاى به‌سره‌، له‌ به‌يانيگ ئه‌را مسته‌فا كازمى سه‌رۆك وه‌زيره‌يل ناو په‌نج كه‌س كانديد كردن له‌ پاريزگاگه‌ ئه‌را وه‌رگرتن پۆست وه‌زاره‌ت نه‌فت، ئاماژه‌ وه‌يه‌يش كردن ك هه‌ڵوژاننيان وه‌ ئاماده‌بوين گشت ئه‌ندامه‌يل و له‌ ده‌نگداينيگ نائاشكرا بويه‌.

له‌و په‌يامه‌ ك ئاراسته‌ كرياگه‌ وه‌ناو نوێنه‌ره‌يل به‌سره‌ و روينويسيگى ره‌سيه‌ ئاژانس شه‌فه‌ق نيوز، باس له‌وه‌ كرياگه‌ 58 كه‌سايه‌تى له‌ پاريزگاى به‌سره‌ ئه‌را كانديد وه‌زاره‌ت نه‌فت پيشكه‌ش كردنه‌ و ئاماژه‌ وه‌يه‌يش كردن له‌ پۆناغ يه‌كه‌م 10 كه‌سايه‌تى ئه‌را ده‌نگداين نائشكرا ئه‌نجام درياگه‌.

باس له‌وه‌يش كرد گه‌شت دويه‌ميش ئه‌نجام درياگه‌و په‌نج كه‌س له‌ليان هه‌ڵوژريانه‌ و كانديد كريانه‌و يه‌يش ده‌رخست ك گشت نوێنه‌ره‌يل به‌سره‌ له‌ هه‌دوگ گه‌شته‌گه‌ ئاماده‌ بوينه‌ ك شماره‌يان 24 ئه‌ندام بويه‌.