شەفەق نیوز/ سەرچەوەیگ ئەمنی عراقی، ئمڕوو جومعە، وردەکاری دویای ئۆپراسیۆن وەناوچگن بارەگای کەتایب حزبەڵا لە بەغداد، ئاشکراکرد ك دویای گیرهاوردن کارگایگ ئەرا دروسکردن مووشەک، و دەسوەسەرکردن ئەندامەیلیگ لە باڵە شیعیەگەی سەروە ئیران.
سەرچەوەکە ک داواکرد ئاماژە وەناوی نەوود، لەوەر گرنگی زانیاریەگان ، ئەرا ئاژانس شەفەق نیوز وت: دویای ورگردن دەسگیرەیل لەلایەن فەرماندەی ئۆپراسیۆنە هاوبشەگان، هێزیگ لە حەشد شەعبی و ئەندامەیلیگ لە کەتایب حزبەڵا روی کردنە ناوچەی خەزڕا، و چینە ناو بارەگای کۆنەیگ ئەرا دەزگای دژەتیرۆر، وەبی رووداویگ، دویای مرافەیگ وە قسەکردن وەل پاسەوان بارەگاگە.
سەرچەوەگە ک خوەی عراقیە هەمیش وت: ئەو کەسەیلە چویچیانە ناوچەی جادریە و دەورگرد ناوچەی خەزڕا، ئەرا جەختهاوردن لەبان مەرەقەزکردن گریاگەیل، و دویای دانوستانیگ وە سەرپەرشتی ئەبو زەینەب لامی وەرپس ئەمنی حەشد، گیریاگەیل وەرگردن، وئیسە هانە بینای وەڕیەوبەرایەتی ئەمن حەشد لە ناوچەی قەنات، ك چەوەڕی بڕیار دادوەر لێکۆڵینەوەی تایبەته‌.