شەفەق نیوز/ شانەی قەیرانەگە لە پارێزگای واسیت، روژ جومعە، ١١ بڕیار نوو لەباوەت رێکارە مقەیەتیگان ئەرا نواگردن ڤایڕۆس کۆڕۆنا دەرکرد، لەلیان سوکەوکردن قەیەغەی هاتوچگن وەل وەردوامی پشوو لەدەوام فەرمی.
لە بەیاننامەیگ ك رەسیە ئاژانس شەفەق نیوز شانەگە بڕیاردا وە وەردەوامی پشوو فەرمی لە روژ یەکشەممەی هاتگ تا روژ پەنجشەممە، بیجگە ئەندامەیل فەرمانگەیل تەندروسی و دەزگا ئەمنیەگان و خزمەتیەگان وهەرچە پەیوەندی وە پڕۆژە خزمەتگوزاریەگان لە پارێزگاگە دیرێد.
هەمیش بڕیار قەیەغەی هاتوچگنە گشتیەگە دا لە روژ یەکشەممەو لە ساعەت ٦ ئیوارە تا ٦ شەوەکی، و نیمچە قەیەغەی هاتوچگن لە ساعەت ٦ شەوەکی تا ٦ ئیوارە، ك گەردین لە ناونی قەزاو ناحیەگان گرێدەو، وه‌بەسانن ریەگان هاتنەناوو ودەرچگن پارێزگاگە وەشیوەیگ یەکجاری.
لە ناو بڕیارەیل شانەگە؛ بەسانن گشت چیشتەخانەگان هاتیه‌ ، بیجگە ئەوانە ک وە سیستم رەسانن بی وەرانوەر كارکەن، هەمیش چایخانەگان و هۆڵ بۆنەگان و مەلەوانگەگان، وقەیەغەی پرسە و گردوبوین له‌ سوورەگان.
و ئاماژەدا وەدروسکردن تیمەیلیگ لە دەزگا ئەمنیەگان لە گشت ناوچەگان ئەرا نواگردن گردەوبوینە گشتیەگان و گەردین له‌ ناو ناوچەگان وەگەرد بڵاوکردن رینمایی مقەیەتیەگان وە بڵنگووه‌یل.