په‌روه‌رده‌ى عراق داوايه‌يليگ ئاراسته‌ى كادر و خوه‌ندكاره‌يل مانگرتگ كرد و وشدارى دا
شه‌فه‌ق نيوز/ وه‌زاره‌ت په‌روه‌رده‌ى عراقى داوا له كادره‌يل په‌روه‌رده‌يى و ئه‌و خوه‌ندكاره‌يله كرد ك وجوود ديرن له مه‌يدانه‌يل مانگرتن و خوه‌ينيشانداين پابه‌ند بوون وه ده‌وام فه‌رمى.
وه‌زاره‌ته‌گه له به‌ياننامه‌يگ وت: مه‌يدانه‌يل خوه‌ينيشنداين مافيگه ده‌ستوور گرته‌سه‌ى خوه‌ى، وه‌ل ئه‌وه‌يشا زانست و ماريفه‌تيش ئه‌ركيگه، به‌ڵكوو فه‌رزيگه له ئايينه‌يل ئاسمانى و هه‌ردوگيان گوزارش له ره‌فتار نيشتمانى ره‌سه‌ن ئه‌كه‌ن و هه‌ر وه‌و خاتريشه بايه‌سه له‌بان گشتمان يه‌كه‌مجار ئه‌ركه‌يلمان ئه‌نجام بيه‌ێم له‌ڕێ ريكخستن خوه‌نين و هه‌وڵ جددى ئه‌را وه‌رگرتن زانست و ماريفه‌ت و له‌وه‌ر ئه‌وه‌يش وه‌زاره‌ته‌گه داوا له خوه‌ندكاره‌يل و مه‌لاكه‌يل په‌روه‌رده‌يى و زانستى ئه‌كا پابه‌ند بوون وه ده‌وام و داوايش له ده‌سه‌يل كۆمه‌ڵايه‌تى و مه‌ده‌نى و رووشنهويرى و ئه‌نجومه‌ن باوگه‌يل و مامۆستايه‌يل و سه‌رپه‌رشكار خوه‌ندكاره‌يل ئه‌كريه‌ێد هاوكار بوون وه‌گشتيانه‌و له‌وه‌ر خاتر وه‌رده‌واميداين وه پرووسه‌ى په‌روه‌رده‌يى جوور زه‌مانه‌ت ئه‌را ئاينده‌ى ئارام و پيشكه‌فتگ نه‌وه‌يل.
به‌ياننامه‌گه هه‌ميش وت: له‌وه‌خت دانيشتن وه‌ل وه‌ڕيه‌وبه‌ره‌يل گشتى له پاريزگايه‌يل و دانيشتنيگ تر ده‌سه‌ى راێ وه‌رگرتن چه‌ن رێ وشوونيگ گيرياسه‌وه‌ر, گرنگترينيان ئه‌يانه‌ن:
1- ته‌واوكرن سه‌عاته‌يل خوه‌نين ك وه‌گووره‌ى مادده‌ى(17)له ياساى وه‌زاره‌ت په‌روه‌رده شماره(22)ساڵ 2011 هاتگه ك ده‌قه‌گه‌ى ئه‌وه‌سه ماوه‌ى ساڵ خوه‌نين په‌روه‌رده له(32)هه‌فه كه‌متر نه‌دێ بيجگه پشوو و سه‌عاته‌يل خوه‌نين هه‌فته‌يس له(30)سه‌عات كه‌متر نه‌دێ.
2- كه‌مه‌وكردن پشوو نيمه‌ى ساڵ ئه‌را ئمساڵ.
3- ئداره‌ى خوه‌ندنگايه‌يل وانه‌يل زيايه ريكبخه‌ن ئه‌را ته‌واوكردن پرۆگرامه‌يل خوه‌نين.
4- ئه‌نجامداين تاقيكاريه‌يل خوه‌نين ئه‌را وه‌رز يه‌كه‌م وه‌گووره‌ى ئه‌و به‌رنامه‌يله ك دانريانه.
5- وه‌ڕيه‌وبه‌رايه‌تيه‌يل گشتى په‌روه‌رده‌و وه‌ڕيه‌وبه‌رايه‌تيه‌يل گشتى ئه‌را سه‌رپه‌رشى و ئداره‌ى خوه‌ندنگايه‌يل وه‌رپرسيارێتى جيوه‌جيكردن ئى خاڵه‌يل ژويه‌ره ئه‌گرنه مل و وه‌چه‌واشه‌ى ئه‌وه ياساو سيستمه‌يل و رينمايه‌يل جيوه‌جيكار له‌بانيان جيوه‌جێ ئه‌كريه‌ێد.
