حكومه‌ت كوردستان ده‌وام فه‌رمى له خوه‌ندنگايه‌يل له ئمڕووه‌و تا 24 ئادار كرده پشوو
شه‌فه‌ق نيوز/ ئه‌نجومه‌ن وه‌زيره‌يل هه‌رێم كوردستان, بڕيار دا له ئمڕوو سێشه‌ممه‌وه ده‌وام فه‌رمى له خوه‌ندنگاو باخچه‌ى مناڵه‌يل و زانكۆ و په‌يمانگايه‌يل ئه‌را نزيكه‌ى يه‌ك مانگ بكاده پشوو، ئه‌ويش وه‌خاتر له‌وه‌رگرتن رێ وشوون ته‌ندروستى له‌وه‌ر نواگيرى له بڵابوينه‌وه‌ى ڤايرۆس كۆرۆنا.
ئه‌نجومه‌ن وه‌زيره‌يل له به‌ياننامه‌يگ وت: له 26 / 2/ 2020 پشوو ده‌وام فه‌رمى له خوه‌ندنگاو باخچه‌ى مناڵه‌يل و زانكۆ و په‌يمانگايه‌يل حكومى و تايبه‌ت تا 10/ 3/ 2020 ده‌س وه‌پى ئه‌كاو دوياخريش پشوو وه‌هارى ده‌س وه‌پى ئه‌كا.
به‌ياننامه‌گه هه‌ميش وت: له‌باره‌ى زانكۆ و په‌يمانگايه‌يل حكومى و تايبه‌ت، پشوو وه‌هارى له رووژ 29/2/2020 تا 23/3/2020 ده‌س وه‌پى ئه‌كا، ئاماژه‌يش وه ئه‌وه كرد رووژ 24 له مانگ ئادار ده‌وام فه‌رمى ئه‌دێ له سه‌رجه‌م ده‌زگايه‌يل زانستى.
