"ره‌باب" فه‌يلى وه كوردى قسه ئه‌كا
2020-05-03 10:39:40
شه‌فه‌ق نيوز/ كه‌ناڵ ئاسمانى كوردستات له مانگ ره‌مه‌زان پيرووز زنجيره دراماى ره‌باب نمايش ئه‌كا ك وه‌زووان كوردى دۆبلاژ كرياگه‌و له‌تى باس له له‌ناوبردن كورده‌يل فه‌يلى ئه‌كا وه‌ده‌س رژيم سه‌دام حسێن.
ئى زنجيره دراما له‌لايه‌ن باسل شبيب دراوه‌ره‌و كار دراوردن ئه‌راى كريا له‌ساڵ 2013 و له‌ى شماره‌يگ له هونه‌رمه‌نديل گه‌ورا به‌شدارى ئه‌كه‌ن و كار وێنه‌گرتن له‌تى ئه‌را 30 هه‌ڵقه له‌ناونى سلێمانى و به‌غدا ئه‌نجام دريا.
ئى دراما له پاڵه‌وانێتى هونه‌رمه‌نده‌يل ئاسيا كه‌مال، ك خانمه هونه‌رمه‌نديگ كورد فه‌يلي - غانم حه‌ميد - سعه‌د موحسن - عه‌زيز خه‌يون - هه‌نا محه‌مه‌د - ئقبال نه‌عيم و هونه‌رمه‌نده‌يل تره، له‌ناونيانيش بڕيگ له هونه‌رمه‌نده‌يل كورد.
