پۆليس هه‌ولێر دو كه‌س له‌وه‌ر دعايه ئه‌را تويشهاتن كه‌سيگ وه كۆرۆنا ده‌سگير كرد
شه‌فه‌ق نيوز/ پۆليس پاريزگاى هه‌ولێر، ئاشكراى ده‌سگيركردن دو كه‌س كرد ك دعايه‌ى دروو ئه‌را گرته‌يگ ڤيديۆيى له‌بان حاڵه‌تيگ تويشهاتن وه ڤايرۆس كۆرۆنا كردنه.
پۆليس له به‌ياننامه‌يگ وت: دوياى بڵاوكردنه‌وه‌ى ئه‌و گرته‌ى ڤيديۆييه له لاپه‌ڕه‌يگ له فه‌يسبوك، كه‌سيگ له‌تى ده‌ركه‌فێد له‌ناو كويچه‌يگ كه‌فتگه‌و هويچ كه‌سيگ له‌لى نزيكه‌و نادێ وه ئه‌وه‌گ گوايا تويش ڤايرۆس كۆرۆنا هاتگه، هه‌ر وه‌و خاتريشه عه‌ميد دلێر نه‌جار فه‌رمان داگه تيميگ له به‌ش په‌يجوورى پۆليس چه‌وديرى دقه‌ت ئه‌و گرته ڤيديۆييه بكه‌ن.
به‌ياننامه‌گه وت: دوياى دقه‌تكردن، ده‌ركه‌فتگه ئه‌و كه‌سه ك له‌و ڤيديۆ نيشان درياگه نه‌خوه‌شى تر داشتگه‌و هويچ په‌يوه‌ندييگ وه ڤايرۆس كۆرۆناوه نه‌يرێد و هه‌ر وه‌و خاتريشه وه فه‌رمان دادوه‌ر و وه‌گووره‌ى مادده‌ى 240 له ياساى سزايه‌يل عراقى ئه‌و دو كه‌سه ده‌سگير كريانه له‌لايه‌ن پۆليسه‌وه‌و ره‌وانه‌ى دادگا كريانه.
