سانا دەنگی لە (هێڤی) داڵگی خوه‌شترە و ناخوازێ گورانی بچڕێ
سانا موحسن دويه‌ت خانمە هونەرمەند هێڤییە، باوگیشی وەرجلە چەن ساڵ یەكێگ بوی لە موزیسیانەيل ناسرياگ، سانا ك ئمساڵ قوناغ دوانزەی خوه‌ندن تەواو كرد خاون بەهرەیگ هونەری و دەنگێگ خوه‌شە و بيجگە لە زووان كوردی وە زووانەیل تریش گورانی چڕێ، لە بارەی گورانی چڕين سانا ئويشێ: لە ئەڵمانیا بەشداری لە بەرنامەی سوپەر ستار كردم و تويه‌نستم فره سەركەفتگانە قوناغ یەكەم بووڕم، وه‌لی لە قوناغ دويەم نەتويه‌نستم بەشداری بكەم، چوينكە بەرنامەگە لەو شارە نەوی ك ئيمە له‌تێ نیشتەجيیمن، باوگم ئەو وه‌خته لە كوردستان بوی و داڵگميش نەتويه‌نست وه‌لم بوود، وه‌يخاترە لە پێشبڕكێیەگە دويره‌و خريامەو.
سانا دووس دێرێ لە بوار ئەندازەی په‌يوەندییەگان خوه‌ندن تەواو بكا و فره عاشق هونەر و گورانی چڕين نييه هەرچەن خاون دەنگێگ خوه‌شيشە، ئاماژەيش وەوە ئەكا ك لە ناو كورد وەو جووره‌گ بايه‌د بوود قه‌در هونەرمەند و كار هونەری ناگیريه‌ێد و كەس ناتويه‌نێ تەنیا لە رێ هونەرەگەیەو بژيوی ژیانی پەیا بكا و داڵگیشی جوور نموونە ئەيه‌رێده‌و ك دووس نه‌ێرێ دويه‌تەگەيشی باێده ناو بوار هونەر لەوەر ئەوەگ كار هونەری ئه‌را ژن كارێگ ئاسان نییە.
بيجگە لە بەهرەی دەنگخوه‌شی لە خوه‌ندنگاگه‌ی خوه‌ی لە وڵات ئەڵمانیا جوور تۆپ مۆدێل هەڵوژريا، وه‌لی له‌وەر ئەوەگ ئەو كارە وه‌ل دابونەریت كومەڵگای كوردەواری نەئەگونجيا وەتایبەتی لە وڵاتێگ جوور ئەڵمانیا وه‌يخاترە نەتويه‌نست وەردەوام بوود لەو كارە.
ا. ج
