گشت ساڵێ ئيوه وه خێر و خوه‌شى
شه‌فه‌ق نيوز/ مه‌حاڵه ئه‌و رووژه فه‌رامووش بكه‌يم ك گۆڤار فه‌يلێ ئه‌را يه‌كه‌مجار چه‌و واز كرد له‌ى دونيا و وه‌ى ژماره‌يشه ته‌مه‌ن سێنزه ساڵه‌ێ گوزه‌ر كرد و چيه ناو ساڵ تازه‌ێ، وه‌گشت خوه‌شى تواسيم و له‌بان گشت ئاستيگى، چوينكه ئى گۆڤاره هووكاره‌مان كرد ك سامانه‌يلمان فريه‌ن و جوور سه‌رچه‌وه‌يليگيش ئاشنامان وه مێژوو و رووشنهويريمان كرد، ك يه‌يش ئه‌را يه‌كه‌مجاره ئه‌رشيف نويسرياێ فه‌يليه‌يل له‌تى خه‌زن بكريه‌ێد له 169 شماره له گۆڤاريگ، ئيمه خوه‌شمان ئه‌ياد له‌ى مێژووه چه‌نه ته‌مه‌ن هه‌رزه‌كاريگه، وه‌لێ ناوه‌ڕوكيگ گرته‌سه خوه‌ێ وه دريژايى ته‌مه‌ن به‌سيه.
وه‌ى بوونه‌ى پيرووزيشه ك ريككه‌فته وه‌ل ساڵ تازه‌ێ زايينى، هه‌وڵ و ته‌قڵاو شه‌كه‌تى ئه‌و كه‌سه‌يليشه ئه‌يه‌ريمنه ياد ك ژيان وه‌پى دان و باوه‌ت ئه‌راى نويسانن و ئويشيمنه خوه‌نه‌واره‌يل ئه‌زيزيش: وه‌خت گشتى موڵكده‌و گشت ره‌نگه‌يل ژيانيش له قرمز و چه‌رمگ و سه‌وز و زه‌رد.. و ڕه‌نگه‌يل تر دوينێده‌ى له‌ى گۆڤاره ك سفره‌ى داخرياييگ رازانه‌سه‌وه‌و شايسته‌ده، خه‌رمان به‌ركه‌ت و وه‌رده‌وامى ئه‌را گۆڤاره‌گه‌و سپاسگوزارييش ئه‌رل شه‌كه‌تى بيده‌نگ تيم كاره‌گه‌ێ.
تابلۆ دويه‌م
جارجاريگ له‌وه‌ر بنياتناين بايه‌سه بڕمنێد و و بايه‌سيشه بيه‌ێد تا موڵكدار بوێد، وڵاته‌گه‌مانيش له‌ى ساڵه تيه‌ڵێ و سزايه‌يليگ هاته تويشێ چه‌نه ده‌يان ساڵ و له‌شوون خوه‌ێ هيشته‌ى جى، هه‌وه‌جه وه ويرانه‌ێ فيشتر نه‌يرێد، ئه‌وكيش مه‌ند خواست وشكه‌وكردن بڕيگ هوير وڕاس وه‌ل داناين مه‌رز له‌ناونى پيكهاته‌يل له‌بان بنه‌ماى هاووڵاتيبوين. ئمجا له عراق ئمڕوو گوزه‌ركردن له مه‌رز ناونى پيكهاته‌يل و ناوچه‌يل بڕيگ له پاريزگايه‌يل له سه‌ردان وڵاته‌يل بيگانه سه‌ختتره. له‌ڕاسى چواريه‌كى مه‌رم وه‌لاى كه‌مه‌و تواناى چگن ئه‌را به‌غداى پايته‌خت نه‌يرن(ئايا هاووڵاتيه‌يل ئه‌نبارى يا موسڵى ئه‌تويه‌نن بچن ئه‌را به‌غدا ئه‌گه‌ر كارمه‌ند يا خوه‌ندكار نه‌ون؟!)ئه‌ڵڵاجه‌وێ نيه ك وڵاته به‌ش شير داشتوود له‌ڕوى جه‌هانيه‌و له ناكووكى و ره‌نجيان له‌ناونى پيكهاته‌يل ملله‌ت و حكومه‌ته‌گه‌ێ.
هه‌وڵ و ته‌قلايه‌يل له جه‌هان له‌وه‌ر لاوردن مه‌رزه‌يل ئه‌دريه‌ێد، وه‌لێ له‌ڕاسى ئه‌و وڵاته‌يله كه‌من ك مه‌رزه‌يل ناوخۆييان فيشتره له مه‌رزه‌يل خارجييان جوور عراق.
وه‌لێ وه بوونه‌ى ساڵ تازه‌ێ زايينى ئايا ئيمه جوور عراقيه‌يل ئه‌تويه‌نيم داڵوه‌خشى يه‌كترى بيه‌يم و لاپه‌ڕه‌ێ تازه‌يگ واز بكه‌يم، چوينكه كه‌س وه وه‌خشين كه‌مه‌و نادێ وه‌نا خودا وه‌گشت ئى عه‌مه‌ته نه‌وێ!.
عه‌لى حسێن فه‌يلى
