باس له هه‌قه‌یل ئاده‌میزاد و هه‌ق تاوانباره‌یل كردیان له‌بان چشته‌یل بى مه‌عناى جویر لاوردن عه‌گاڵ یا بردن ده‌فته‌ر یا ده‌رخستن ناڕه‌زایى له‌بان ئه‌وه‌ك نوێنه‌رایه‌تیان كردیاگ له‌وه‌رده‌م شه‌رعیه‌ت دادگاو حكوومه‌ت و ئه‌نجوومه‌ن ، جویر ئه‌وه‌ك خوه‌یان وه فریشته داناوین و له‌وه‌خت خوه‌یان گشت ئازادییگ داوینه ملله‌ت .
ئه‌وانه زیاتر له 40 ساڵ دروو كردن وه‌ل عراقیه‌یلاو هه‌ر ئه‌وانه عراق ره‌ساننه ڕووژگاریگ سیه‌تر له تیه‌ریك ، بیگومان یه‌یش بوختان نیه‌و ڕاسیه ، چوینكه له‌شوون رمیان رژیم گشت چشتیگ ئاشكرا بوى جویر قه‌وره‌یل وه‌جه‌م و ئاشكراكردن هه‌زاران تاوان تر و قوربانیه‌یل فره‌یگ ك تائیسه‌یش وه‌ده‌نگ به‌رز هاوار كه‌ن له‌ڕوى سه‌دامیه‌یل و ئویشن له‌وه‌ر چه گشت ئى تاوانه‌یله ؟
له‌ى باوه‌ته‌وه كاك (حه‌سه‌ن وه‌لى ئه‌سغه‌ر ئه‌ڵوه‌نى) نامه‌یگ ئاشكرا كردگه وه‌بوونه‌ى كاره‌یل ناوه‌جى رژیم وه‌رین و ئه‌و كاره‌ساته‌یله ك ده‌رهه‌ق وه‌ملله‌ت كورد وه‌گشتى ئه‌نجامى داگه‌و ده‌رهه‌ق وه كورده‌یل فه‌یلى وه‌تایبه‌ت .
حه‌سه‌ن وه‌لى ئویشیگ :من له‌ناونى ئه‌و جایه‌ڵ جوانه‌یل كورده بویم ك شماره‌یان زیاتر له 15 هه‌زار بوى و ده‌سگیر كریاوین له‌سه‌ره‌تاى ساڵه‌یل هه‌یشتاى سه‌ده‌ى وه‌رین ، ك خیزانه‌یلیان وه‌مه‌هانه‌ى ته‌به‌عیه‌ى ئیرانى ده‌ركریان وه‌ره‌و ده‌یشت عراق و له‌وانه‌یش بویمن ك خزمه‌ت وه‌سوپاى عراقى كردیایم له‌ژیر سایه‌ى په‌رچه‌مه‌گه‌ى و هه‌ر ئه‌وه‌نه زانستیم بریایم ئه‌را زندانه‌یل ترسناكیگ و مامڵه‌ى نائنسانى وه‌لمانا كریاو جیاواز بوى له‌زندانه‌یل نازى و فاشستیه‌یل ، سزاى لاشه‌یى و ده‌روینى بى وینه بوى له‌تى و ته‌نانه‌ت له‌زندانه‌یل چه‌رخ ناوڕاسیش له‌یوا سزایگ نه‌وى .كاروان سه‌ره‌تاى سزاداین له زندان شماره (1) ترسناكه‌وه ده‌س وه‌پیكرد ، یه‌یش بیجگه ئه‌وه‌ك شوونه‌گه فره ته‌نگ و كوڵه‌مه‌رگى بوى و دڕنده‌ترین مامڵه‌یش وه‌لمانا كریاو ئه‌و خواردنیشه ك دیانه‌ى پیمان ورسگیمان نه‌شكان . له‌شوون ئه‌وه‌یش له‌زندان شماره یه‌ك جیواز كریایم ئه‌را زندان (ئه‌بو غرێب) ك ئه‌ویش هویچى كه‌متر نه‌وى له‌زاندان شماره یه‌ك ته‌نیا ئه‌وه نه‌وگ كه‌میگ گه‌وراتر بوى ، وه‌لى له‌ڕوى مامڵه‌كردنه‌وه پیستر بوى و تاڕاده‌یگ جایه‌ڵ جوانه‌یل ناچار بوین روى وه‌ڕوى ده‌سڵاتداره‌یل زندانه‌گه بوونه‌وه‌و ره‌سم سه‌دام بدڕن و گشت ئه‌و دروشم یا شعاره‌یل سه‌دامیه ك له‌بان دیواره‌یل زندانه‌گه نویسیاویگ بكوشننه‌وه . وه‌لى كاردانه‌وه‌ى ده‌سڵاتداره‌یلیش له‌و زندانه نائنسانى و له‌بان شیوه‌ى به‌عسیانه وه‌شكیانه پیمان وه‌كێبڵ كاره‌بایى و چه‌ن كه‌سیگ له‌لیمان كوشیاو زیاتر له(700) له‌لیمان جیواز كریان ئه‌را شوونه‌یل نادیار ك تا ئیسه‌یش هویچ هه‌واڵیگیان نیه‌زانیم . سزایه‌یل تریش ئه‌وه بوى ك حجز كریایم له‌ناو ئه‌و زندانه‌یله‌و ئاسنگه‌ر تایبه‌ت هاوردن و له‌حیم قاپیه‌یل له‌بانمان كردن و هه‌ر غورفه‌یگ و 25 كه‌س له‌تى بوى و رووشنایى خوه‌ر نه‌ینه چه‌و .وه‌هه‌ر حاڵ ئه‌گه‌ر خواردنیگیش ئه‌ڕامان باتاگ له كوناى غورفه‌گه‌وه نیه‌مه‌و ناته‌واو ره‌سیاگه پیمان و هه‌ر له‌وه‌ر ئه‌وه‌یش زندانیه‌یل داواكاریان ئه‌وه بوى له‌ده‌سڵاتداره‌یل ده‌ریان بكه‌ن له‌زندان ، وه‌لى جواو ده‌سڵاتداره‌یل ئه‌ڕایان ئه‌وه بوى ك ده‌یه‌ها سه‌یاره‌ى گه‌ورا ئه‌ڕایان هاوردن و جیوازیان كردن ئه‌را زندان (نگره سه‌ڵمان) له‌بیاوان باشوور ، ئه‌وه‌یش دویا محه‌ته‌ى هه‌زراره‌ها جایه‌ڵ جوان بوى و ژیانیان كه‌فته وه‌ر مه‌كینه‌ى سه‌ربڕین به‌عس . حه‌سه‌ن وه‌لى ئویشیگ : قورتاربوین چه‌ن كه‌سیگ له‌لیمان فه‌رمانیگ خودایى بویه . ئمجا دویاى ئى هه‌گه سزاداین و مامڵه‌ى نائنسانیه ده‌رهه‌ق وه كورده‌یل ئایا پیاوه‌یل سه‌دام له‌ناو قه‌فه‌س دادگا پرسیار له‌خوه‌یان كه‌ن ئه‌و گشت جووره سزاى بى دادگاییكردنه مه‌عناى چه بوى ؟ ئایا له‌هویریان چى ئه‌و حوكمداینه‌یله ك هاتیاگ له‌لایه‌ن ده‌زگاى قانوونى له‌دیوان سه‌ركردایه‌تیه‌وه ئاماده‌كریاگ یا جاهز بوى و هویچ تر نه‌تواس ؟ ئایا گشت ئه‌و كاره‌ساته‌یل دڵته‌زن هه‌ڵه‌بجه‌و كورده‌یل فه‌یلى و ئه‌نفاله له‌هویریان چى تا ئیسه باس له شیوه‌ى دلدگاییكردن بكه‌ن . ئایا زندانه‌یلیان گوڵڕیژ كریاویگ .
