وه‌ختێگ له شوونێگ بویچگ (جوور سایت یا وبلاگ ) ژماره‌ێگ ئایم گه‌ورا دوینى وه مه‌یل خوه‌یان جه‌مه‌و بوینه دڵد خوه‌شه‌و بوود ك هیمان ئى مه‌ردم خوه‌مانه كه‌سه‌یل ناودار و زانا دیرن تا له وه‌خته‌یل سه‌ختى و بنیات نان ئه‌گه‌ر هه‌وه‌جه وه پیان داشتویمن رێ نیشانمان بیه‌ن! تا ئیره‌ى باسه‌گه‌مان دڵشكیان و دڵسه‌ردى له ناوى نیه ، ئه‌وه‌ى ك له شوون یه هه‌س ئه‌زره‌ته‌مه‌ن ئه‌وه‌یمن ك ئى قه‌درداره‌یله وه ئه‌رك یا واجب خوه‌یان وه شیوه‌ێگ ئه‌ڵسن ك بزانن چه دیریمن و چه خوازیمن و چه بایه‌د بكه‌یمن تا له قافڵه جى نه‌مینیمن؟!
فره له رووشنهویره‌یل و خاوه‌ن پله‌و پایه‌ى به‌رز زانستى و سیاسى و هونه‌ری ك سه‌ر وه كوردستان خوارگن له یه‌ك چشت هاو فكر و هاو شیوه‌ن و تویه‌نم بویشم جوور یه‌ك هویره‌و ئه‌كه‌ن!
ته‌نیا خاڵ هاوبه‌ش له ناونیان ئه‌وه‌سه ك وه زه‌حمه‌ت وه ده‌ور یه‌كا جه‌مه‌و بوون و كارێگ هاوبه‌ش پووڕنن وه‌لى وه ئاسانى له یه‌كتر دویره‌و كه‌فن و ئاسانتر له ئه‌وه‌ش دڵ یه‌كتر شكنن و له گشتى ئاسانتر سه‌ر ئه‌ڵگرن و له وڵات فه‌رامووشى و له هویره‌و بردن بوونه ده‌رویش هیچمه‌كارى و چه‌وه‌یلیان له بان رێ چه‌وه‌رێ چه‌قنن تا كه‌سێگ یا لایه‌نێگ ئه‌رك و كار ئه‌وان وه جى بارى!! لێره خوازم بویشم ك ئایا ئى هه‌مگه‌ى شه‌كه‌تیمانه ته‌نیا ئه‌راى ئه‌وه‌س ك له وه‌راوه‌ر جامه‌ك وژدان وه‌ل خوه‌مان دروو بویشیمن و مه‌هانه‌ى ئه‌وه باریمن ك ئه‌را كارێگ ناكه‌یمن تا شوونهاته‌گه‌ى سه‌وز بوود و شیر داڵگمان حه‌ڵاڵ بكا!؟
له‌و هه‌مگه رووشنهویر كورد ناوڕاس و خوارگ عراق، له‌و هه‌مگه هاوزوان و هاو فكر كوردستان خوارگ ك دوكوت فیشتریان هانه كوردستان ئیران سه‌رم سوڕ مینێد ك ئه‌را چنه ره‌فتار ئه‌كه‌ن ك چمان نه بیه‌سان و نه‌هه‌سه‌مان !! وه رووژو مانگ و ساڵ هه‌واڵ پرس یه‌كتر نیمن!! ئه‌راى نموونه له خاوه‌ن ئه‌و هه‌مگه( سایت – وبلاگ) كوردى خوارگ كوردستانه كه ته‌نیا وه زوان ره‌سمى و نه وه‌زوان داڵگى چشت نویسنن پرسیار ئه‌كه‌م ك كى هانا ره‌سیانه ئه‌گه‌ر رووژى هزار جار بمرن و ئه‌را كه‌س ناویان وه زینگى و مردگى نارێ! فره‌ن ئه‌وانه‌ى ك وه زه‌وق و شه‌وقێگ راسكانى هاتنه ناو مه‌یدان كوردى نویسان و نویسانن وه زاراوه یا له‌هجه‌ى خوارگ وه‌لى یا رێ گوم كردن یا دڵسه‌رده‌و بین و نه ته‌نیا زوان داڵگى له هویره بردن به‌ڵكم زوان ده‌سه‌ڵاتیش نه‌كردانه ئه‌و قاره‌مانه ك هه‌میشه ئاره‌زووى داشتن و دیرن! ئه‌راى ئه‌وه ك ناویان و ناومان زینگ بمینێ تویه‌نیمن له فره چشت هویرو باوه‌ڕه‌یلمان جیاواز بوود و هه‌ركه‌س وه شیوه‌ێگ باس خوه‌ى بكا وه‌لى دویاجار گشتمان یه‌ك زوان دیریمن ك ئه‌ویش زوان داڵگیه و له ناو كورده‌یل خوارگ چنه بیناز كه‌فتگه ك ئاینده نێرێ.
لیره پرسم ك ئایا ئى دڵسه‌ردى و دویره‌و كه‌فتن ڕووشنهویره‌یل و شاعر و نویسه‌ره‌یلمان له له‌هجه‌ى كوردى خوارگ كار ده‌سه‌ڵات سیاسیه یا بى باوه‌ڕى خوه‌مانه وه‌ى كاره؟ ئیمه زانیمن ك:
1- شاعر و نویسه‌ر تویه‌نێ وه زوانێگ بنویسێ ك فیشتر خوه‌نريه‌ێگ و دى له‌ى رووژگاره چشتێگ وه ناو پیروزیه‌یل یا موقه‌ده‌سات زوان داڵگى نه‌مه‌نیه وه‌لى وه‌ختێگ بووده شاعر و ڕووشنهویر نه‌ته‌وه‌یى ك زوان داڵگى َخوه‌ى و مه‌سه‌له‌ى ملله‌ت خوه‌ى له هویره‌و نه‌كا!!
2- فره جار شماره‌ى كوردى نویس له كوردى خوه‌ن له به‌ش كوردستان خوارگ فیشتره و هه یه‌سه بسین كتاو چاپ كریاگ فره كه‌متره له ئه‌وانه‌ى ك خوازن پیشكه‌شیان بكریه‌گ.
3- مه‌یل و هه‌س نه‌ته‌وه‌یی یا قه‌ومى فیشتر ها ناو مه‌ردم ژار و فه‌قیر و ئه‌وانه‌ى ك له غه‌ریوى ژیه‌ن نه ئه‌وانه‌ى ك خاوه‌ن فكرو قه‌ڵه‌من، دى شه‌رم ئه‌وه نه‌مه‌نیه ك ئه‌گه‌ر كه‌سێگ زوان داڵگى خوه‌ى نه‌زانێ وه ده‌نگ به‌رز شانازى وه زوان بیگانه بكا!
4- ره‌سانن ره‌سمى كوردى له هه‌رێم كوردستان نه‌بیه‌سه ره‌سانن ئه‌راى گشت ملله‌ت كورد و پشت له فره زاراوه یا له‌هجه‌ى كوردى كردگه یه‌ش له وه‌ختێگ ك هیمان زوان یه‌كگرتگ كوردى خاس ریشگ نه‌كوتاس و نیاز وه‌و زاراوه‌یله دیرید.
5- رووشنهویر و نویسه‌ر و هونه‌رمه‌ند كوردستان خوارگ جوور به‌شه‌یل تر كوردستان ناز كیش نێرن و مه‌ردم ئیمه‌ش نازانن وه كوردى بخوه‌نن ناچارن هانا ئه‌راى زوان ره‌سمى له وڵات خوه‌یان بوه‌ن ك بیجگه له هه‌ریم كوردستان له هیچ وڵاتێگتر كوردى نیه.
