هه‌رێم كوردستان عراق نه‌وگ ، چوینكه ئه‌وان له‌سایه‌ى خوداوه تاڕاده‌ى خاسیگ خوه‌شگوزرانن ، كه‌فنه هویر و وژدان وه‌رپرسه‌یل عراقه‌وه ، وه‌تایبه‌ت وه‌زیر بازرگانى ك وه‌باوه‌ڕ و قه‌ناعه‌ت خوه‌ى گوایا خه‌م ملله‌ت دیریگ و دڵى سزیه‌یگ ئه‌را خیزانه‌یل ره‌ش و ڕویت وڵاته‌گه‌ى ، هه‌ر له‌وه‌ر ئه‌وه‌یش نوڕید چه‌ن رووژیگ وه‌رجه قدوم ئى مانگ پڕ خه‌یر و به‌ره‌كه‌ته خوه‌یان وه‌ته‌نى توان ده‌س یارمه‌تى دریژه‌و بكه‌ن و نه‌وس مه‌ردم نه‌دار و كه‌مده‌س نارنه مل خوه‌یان ، وه‌لى ئیمه ئه‌گه‌ر بایگ و خاس هویره‌و له‌لى بكه‌یم و هساو ئه‌و به‌شه خوه‌راكه بكه‌یم هه‌ر له‌به‌شه‌گه‌ى خوه‌مانه‌و زویتر له‌لیمان بڕینه‌سه‌ى ك جویر سه‌ده‌قه یا سه‌رفتره‌ى یه‌تیمانه‌یگه‌و له‌بان ئه‌وه‌یشه‌وه ئه‌وان منه‌ت له‌بانمان كه‌ن . هه‌ر وه‌ى بوونه‌یشه‌وه دونیا وه‌پى ره‌سننه‌وه‌و ژنه‌فیم ك وه‌زیر بازرگانى له‌مانگ ره‌مه‌زان خوه‌راك زیایه ده‌یگه خیزانه‌یل فه‌قیر و كه‌مدرامه‌ت و هه‌زاران خیزان به‌شدارن له‌و خوه‌راكه ، ئمجا مه‌ردمان فره‌یگ شایه‌ت ئه‌وه‌نه ورسگى و نه‌دارى كاریگه‌رى له‌لیان كردگه ئه‌و خوه‌راكه وه زیایه بزانن ك دریه‌یگه پیان ! وه‌لى له‌ڕاسى ئه‌و خوه‌راكه ك دابه‌ش كریه‌یگ جویر ئه‌وه‌ك ئشاره‌ت وه‌پى كردیم به‌شیگه له‌خوه‌راك مانگه‌یل زویتر ك وه‌پیان نه‌دریاگه‌و ئه‌ڵیگرتنه مانگ ره‌مه‌زان ك مانگه‌یلیگ زویتر له‌لى بیبه‌ش بوینه ، چوینكه هویچ مانگیگ نیه خوه‌راك (الحصه التموینیه) وه‌ته‌واوى بڕه‌سیگه ده‌س خیزانه‌یل . ئمجا دوینید وه‌و خاتره به‌یاننامه‌یگ له‌وزاره‌ت بازرگانیه‌وه ئاماده كریه‌یگ و له‌كه‌ناڵه‌یل ته‌له‌فزیۆن و سایت و ڕووژنامه‌یله‌وه په‌خش كریه‌یگ له‌ژیر ناونیشان (خوه‌راك زیایه‌و له‌وه‌ر خاتر پڕه‌وكردن هه‌وه‌جه‌یلیان له به‌شه‌خوه‌راك مانگانه) .
له‌یرا پرسیار كه‌یم له وه‌زیر بازرگانى و ئویشیم : ئایا ئه‌و (11) مانگه‌گه‌ى تر (به‌شه‌خوه‌راك) مه‌ردم ئه‌راچه وه‌بى كه‌م وكوڕى (نقص) نیه‌ڕه‌سنینه‌ى خیزانه‌یل و له‌لى خوه‌ین ؟ ئایا تواین وه (په‌نج) كیلو (ئارد چه‌رمگ) ڕازى مه‌ردم بكه‌ین و هه‌ق ئى ملله‌ته بیه‌ین ؟ نه‌خه‌یر هویچ وه‌ختیگ ئى به‌شه خوه‌راكه زیایه نیه‌و هه‌ق خوه‌مانه‌و ئیوه داگیرى كردینه‌و خستینه‌سه‌ى ئه‌مباره‌وه‌و ئیسه‌ى ده‌ینه‌ى پیمان ، یه‌یش ئه‌و مه‌سڵه‌ت كورده‌وارى خوه‌مانه خه‌یگه هویرمان ك ئویشیگ { له‌ڕوین خوه‌مان ده‌ن له‌سیوڵ یا شوارب خوه‌مان} . وه‌لى دیاره ئه‌وان ئى ملله‌ته وه‌نه‌فام ده‌نه قه‌ڵه‌م و له‌یوا هویره‌و كه‌ن مه‌ردم وه‌ى به‌شه‌خوه‌راكه خه‌ڵه‌تیه‌یگ ، نه‌خه‌یر ئه‌یه رسواییه ئه‌را خوه‌یان و داروده‌سه‌یان و هویچ منه‌تیگ نه‌یریگ له‌بان ملله‌ت و هه‌ق خوه‌یانه‌و زویتر بڕیاگه‌و نه‌ڕه‌سیه‌سه ده‌س خیزانه‌یل . ئه‌گه‌ریش ئه‌و كه‌مه خوه‌راكه نه‌وگ ملله‌ت وه‌هه‌رچى بووگ ژیه‌یگ و نیه‌مریگ له‌ورسگى . وه‌لى له‌جیاى ئه‌وه‌ك بویشن (به‌شه خوه‌راك زیایه) خاستر ئه‌وه‌سه بویشن (خوه‌راك زیایه‌ى زه‌فتكریاگ له‌ملله‌ت) تا مه‌ردم باوه‌ڕ وه‌پیان بكه‌ن .
