نامەێگ بەهمەن قوبادی ئه‌ڕا نوری مالکی
شه‌فه‌ق نيوز/ سینەماکار ناودار کورد نامەيگ ئه‌ڕا نوری مالکی نويسێ و ئاماژە وەوە ئەکا:" لەگشت ئەو ساڵه‌يلە ک کورد له عێراق کۆمەڵکوژ ئه‌کريان، کیمیاواران ئه‌کريان و یا ئەوە ک چنگ خويناوی ئەنفال، روخسار پاك و نازك کوردستان ڕنياد، ئيوە لە کوو بوين؟"
بەهمەن قوبادی نامەگەی لە ماڵپەڕ فەرمی خوه‌ی لە تووڕ کومەڵایەتی فەیسبووک بڵاوه‌وکردگه‌سەو و ئويشێ:" وە پویل ئەو هەمگه نەفتە ک لە ماوەی 10 ساڵ گوزه‌يشته فرووشتينەسه‌ی، چ کارێگ ئەوتۆ ئه‌ڕا شیعە و سوننيەيل کردينە ک کوردەيلیش دڵیان وه‌پێ خوه‌ش بوود و متمانە وە توانایی و هاودڵی ئيوە داشتوون و دەسەڵات فرووشتن نەفت بسپارنە ئيوە؟ نە چشتێگ وە ژێرخان وڵاتەگە زیاێ کردينه و نە وە ئاسایش و سەقامگیرییەگەی."
دەق نامەگەی بەهمەن قوبادی ئه‌ڕا مالکی:
جەناب مالکی، سەرۆک وەزیره‌یل قه‌دردار عێراق
سه‌ڵام
وە زووان فارسی نامەگە ئه‌ڕادان نويسم، چوينکە زانم لە گشت ئەو ساڵه‌يلە ک وه‌ل هەڤاڵه‌يل و هاوهویرەيلدان لە ئيران ژیان بردينه‌سە سه‌ر، وە خاسی هووكاره‌ی ئی زووانە بوين، وەکاری هاوردينە و ئيسه‌يش هەر وەکاری ئه‌يه‌رين.
من گشت وه‌ختێگ لە دۆنیای سیاسەت بێزار بويمه‌و وەردەوام لە سیاسەتمەدارەيل دوير گردمه، وه‌لێ مه‌مه‌ر ئه‌وه ك ئيسه واز لەی خووە وەدەر لە عادەتمه هاوردمە و ئی نامە ئه‌ڕا ئيوە نويسامە، ئەوە بوی ک ئمڕوو، لەشه‌وون وه‌دوياچوين هەواڵەیل عێراق و ناوچەگە، دیم ک وە زووان هەڕەشە قسە کەسن.
وه‌ختێگ لە کوردستان ئسران بوسم دوینيام ک لە گەرمەی جه‌نگ، پويليگ ک لە لایەن دەوڵەت ناوەندی بايه‌د ئه‌ڕا ژیان، ئاسایش و کەلتوور ئيمەی کورد سەرف بکريه‌ێد، وە بیانگ جووراوجوور سیاسی ئه‌ڕا دابینکردن خەرجە گەوراگان ئيوە و کەسه‌يلێگ جوور ئيوە سەرف ئەکريا. ئيسه له‌شوون گوزه‌يشتن ئی هه‌مگه‌ێ ساڵه، ئيچنه دیارە خووگرتن وه نەفت و پویل نەفت، وڵدان نەکردگه و هاينە شوون تومارکردن و دەس گردنه بان و چه‌ودێری له‌بان داهات نەفت هاووڵاتیه‌یل کورد خوه‌دان لە بەرژەوەندی دەوڵەت ناوەندی عێراق. ئەو هاووڵاتیه‌يلە ک ـ وەڕاسی بويشم ـ لە نیشتمان پەروەی ئيوە رەشبینن.
لەگشت ئەو ساڵه‌يلە ک کورده‌یل عێراق کۆمەڵکوژ ئەکريان، کیمیاواران ئەکريان و یا ئەوەی ک چنگ خويناوی ئەنفال، روخسار پاك و نازك کوردستان ڕنياد، ئيوە لە کوو بوين؟
مەگەر ئەو وه‌خته کوردەيل هاووڵاتی ئيوە نەوين؟ ئيوە و هەڤاڵه‌يلدان لەی وڵاتە چين و لە چه‌وەڕێ كردن رووژه‌یل خوه‌ش سەرۆک وەزیری، سويچێگ ئەمن و بێدەنگ ئه‌ڕا خوه‌دان هەڵوژانين. وه‌لێ کوردەيل لە وڵاتەگەیان مه‌ننەو و وه‌ل جه‌نگ و تاڵانکردن و توندوتیژی و كه‌مده‌سی رووژگاریان برديانەسەر و عاشقانە خزمەت نیشتمانەگەیان کردن.
ئيسه، ڕێك وه‌ختێگ هەلوومەرجەگە رەخسياس تا له‌شوون ئەو هه‌مگه بەڵا و نەگبەتییە، بتويه‌نن وە فرووشتن نەفت، نیشتمان داڵگییان، ماڵە رمياگەگەیان سەرلەنوو بسازن، ئەو زەویه‌يلە ک پڕ لە مینن ئه‌ڕا کشتووکاڵ ئامادەی بکەن و ئه‌ڕا لەش کەمئەندامەیل مه‌ردم ئی نیشتمانە دەست و پاێ دەسکرد دروس بکەن، ئه‌خوازن رێ لەوانە بگرين و نواگری لە پێکهاوردن بەهەشتێگ لە باکوور وڵاتەگەدان بکەين؟
وە لەوەر چه‌وگردن ئەو هەمگە نەفتە ک لە ناوەند و باشوور عێراق فرووشينه‌ی، چ هه‌وه‌جه‌ێگ وەی چەن چاڵ نەفتی کوردستانه ديرين؟ لەراسيا وە پويل ئی هەمگە نەفتە ک لە ماوەی 10 ساڵ گوزه‌يشته فرووشتينه‌سه‌ی، چ کارێگ ئەوتۆ ئه‌ڕا عێراقییەيل شیعە و سوننی کردينە ک کوردەیليش دڵیان وه‌پێ خوه‌ش بوود و متمانە وە توانايی و هاودڵی ئيوە داشتوون و دەسەڵات فرووشتن نەفت بسپارنە ئيوە؟ نە چشتێگ وە ژێرخان وڵاتەگە زیاێ کردينه و نە وە ئاسایش و سەقامگیرییەگەی. وه‌ختێگ کوردەيل ئيوە وه‌سەربەست لە هێزەيل بێگانە دانانه‌ن و هانه بان ئه‌و باوه‌ڕه ك دەوڵەت ئاڵۆز و بێ دەسەڵات ئيوە زیاتر لەوەگ وه‌هوير مه‌ردمه‌گه‌ێ بوود ها لە هویر هاوڕێی و هاودڵیی وه‌ل هێزەیل بێگانه، ئاشکراس ک روی خوه‌ش خوه‌یان نیشان ئيوە نادەن. ئه‌ڕا چه بايه‌د داهات فرووشتن نەفت هەرێم کوردستان لە رێ سندووق دەوڵەت ناوەندییەو بگوزه‌رێ؟ وه‌ختێگ مەترسی ئەوە هەس ک بەشێگ لەی پويله بڕشيه‌ێدە گیرفان دەڵاڵەیل چەک و بوار سەرکوتکردن و کوشتن لە بەشێگ لە ئی وڵات یا ئه‌و وڵات؟
سەرۆک وەزیر قه‌دردار!
لە جیاتی پەرەوه‌پێداين وە قين و دوشمنایەتی و دوبەرەکی نەتەوەیی و ئایینی، خاستر نییە دەس بكه‌ينە کارێگ خاس و رێکوپێک و وە دامەزرانن دەوڵەتێگ فیدراڵ، پێکهاتگ لە شیعەيل، سوننيەيل و کوردەيل لە ژێر یەک ئاڵا، هەم ئاشتی و خوه‌شی و وەرەونواچين ئه‌ڕا وڵاتەگەدان وە دیاری بارين و هەمیش ناو و ناوداري خاسێگ لە خوه‌دان لە مێژوو تومار بکەين؟ له‌وه ترسم ک وە دريژه‌داين وه‌ی رەوتە، روخسارێگ ناحەز و سييه و ناوێگ خراو لە خوه‌دان لە کتاو مێژووی وڵات تومار بکەين.
سەرۆک وەزیر قه‌دردار! ئایا تا ئی وه‌ختە وه‌ده‌ر لە پیشەی سیاسەت و دۆنیای سیاسەت، تماشاێ نەخشەی عێراق کردينە تا بوینن کوردستان ها لە کووره‌ی ئی نەخشە؟ دڵ عێراق نیشانەی خوه‌دان مەکەن سەرۆک وەزیر قه‌دردار، ک ئاکام خاسێگ نه‌ێرێ، نه‌يلن وەهار کوردی سەرهەڵبدا. قه‌ێ چه ئه‌كا ئه‌گه‌ر بيلين عێراق بەهەشتێگ له‌ناو دڵی بوود ؟
لۆتفه‌ن کوردەيل وه‌حاڵ خوه‌ێان بيل جەناب سەرۆک وەزیر!
ا. ج
