ته‌نیایى
م چوین بویشم له ڕیوارى
چه بویشم م له ڕیوارى؟
هوا ساماڵ
نه ئه‌ورى هه‌س
نه گرمه‌ى ئه‌ور
م چوین بویشم
له واراناو
چه زانم بویشم ئه‌ى مه‌ردم؟
له ئى ساڵ
نمه وشكه
له گرمه‌ى ئه‌ور
له تافه‌ى ئاو
***
تو پیم نیه‌ویشى
چه لیم خوازى؟
م چوین بویشم
له دڵخوازى
له ئى شار چپ و راوه
له ده‌وره‌ى ك
خه‌وه‌ر چاوه
چ دڵخوه‌ش له
دڵ و دڵخواز؟
له یار و ڕاز؟
له بى ده‌نگى بپرسن
ك هاوارم چه‌نى به‌رزه؟
له شه‌وه‌زه‌نگ بپرسن
ك ڕووژ و م چه‌نى دووسیم؟
چه‌نى گیرم
له سه‌رساڵى
وه‌هار و ئه‌ور.
چه‌نى نووڕم
وه قه‌یرانى
ڕه‌فیقى
پڕ له‌ژانى
دار و ته‌ور.
***
تو پیم نیه‌ویشى
خه‌نگ چوى تیه‌ى
وه سه‌ر لیوت؟
له ده‌وره‌ى ك
قتى ساڵ دڵ وقه‌نه
قرانقه‌رنى
مناڵه‌یلى
گوڵ و نانه.
تو پیم نیه‌ویشى
م چوین باسى
خه‌نگ بكه‌م؟
چه بویشم م ؟
له ساى دارى
بزه‌ى بى خه‌م
چه‌پگ چه‌پگ
گوڵ شه‌و بو
له خه‌و چنین
له خه‌و خوه‌ش بوین
له ڕووژ مه‌رگى هاوساماڵ
چراخانى
وه‌ره‌یوانى
وه ره و ده‌لیا
له تیه‌ریكى
چه‌و و سفره‌ى
هزاران ماڵ
شار جه‌شنى نوو
***
تو پیم نیه‌ویشى
ك ڕى كامه؟
له چوارده‌ڕیانى ئى ده‌وره.
له ده‌وره‌ى ك
ڕى و ڕیوار
له یه‌ك دویرن
چه بویشم م
ك ڕیم كامه؟
وه‌ره‌و كوو چم؟
چه بویشم م؟
تو چیشتى بویش.
چه‌وم گووشه
زووانت چه‌و
تو چیشتى بویش
له ڕى.
له شه‌و.
له دڵخوازى.
له شار سه رد پرگه‌رمى.
له دارى
هشكى هاوارم
له پاییزى كه‌رى ده‌وران.
له باخ سه‌وز گونایلت.
وه‌هار ئابادى به‌رز و پاك.
دویاى واران گه‌رم چه‌و.
تو چیشتى بویش
تو چیشتى بویش
چه‌وم گووشه
زووانت چه‌و
دڵم چاڵه
له گووشه‌ى شه‌و.
تو چیشتى بویش
ئرا
ئى شار پڕ ڕه‌نجه
ئرا
ئى یارى به‌دبه‌خته.
تو چیشتى بویش
تو چیشتى بویش
چه‌وم گووشه
زووانت چه‌و
دڵم چاڵه
له گووشه‌ى
