وه‌ت باوگه چیمه ماڵیگ دیم گشتی وسیانه

پیایگ و ه بان جی بی ژنه‌ی نه‌خوه‌ش وه‌ ئیلا

دیم دویه‌ته بویچگه‌لانه‌ی دس کرده ئاسمان و

وه‌ گیره وه‌ت خودایا م زانم هایده ئیردا

وه خاتر ئه‌و هه‌مه‌ دانه‌یل ناو باخچه‌مان

به‌و باوگ و داڵگ م خاسه‌و بکه‌ وه‌ یه‌ی جا

یه‌ی ڕووژ تریش وه‌ یی جی گیایگ نوای ڕیم گرد

وه‌تیا ئه‌گه‌ر توایدن 20 بگری وه ئملا

چشتیگ کومه‌ک بکه‌و م، م  وه‌ل خوداوه دوسم

ئیوشم هویری وه پید بوود تا بوینیده وه دویورا

یی ڕووژ تریش وه‌ مالیگ دیم یه‌ی پیایگه قاڵ که‌ی

هر قسیه که‌ی وه‌ گه‌رد خوه‌ی هه‌ر ئیلا که‌ید و ئه‌ولا

روی کرد وه‌ ئاسمان و وه‌ت هویچ ئه‌رام نه‌کردی

دی قسیه و ناسزاد که‌م دی کفرد  که‌م وه قینا

ئه‌و ڕووژیشه وه‌ پای هه‌وز مه‌لویچگی هه‌ر ئاو خوارد

جیکانیاد وه‌  وه‌ل خوه‌ی ئه‌ڵاجه‌ویه‌یلی وه‌تیا

دیم دایه پیره پیم وه‌ت زانی ئه‌و چه‌که‌یدن

ئه‌و مه‌له دیری ئویشی شوکرت خدای ته‌نیا

که‌ژاڵ دوسمیش وه‌ت خودا فه‌ره ها له دویر

ئیمه نوینیمنه‌ی چه‌و خودا هاله ئافریقا

ڕووژین هه‌میشه ئویشی م ناو کتاو خوه‌نیمه

یا ها له که‌ش که‌شانه‌یل یا ها له تای ده‌ریا

باوگه تو خوه‌د ئه‌رام بویش جوواو ئی سئواله

راسی خودا ها له کو خودای خاس و گه‌ورا

وه‌تم تو خوه‌د وه‌ تیده‌ی دی مه‌ چه‌ ئه‌رای تو بویشم

خودا ئه‌وقه‌ره‌ گه‌وراس دوینیدنه‌ی وه‌ هه‌رجا

دویه‌ته‌م خه‌نست و وه‌تیاد دی زانم ها له کووره

هه‌ر جا فکری بکه‌یدن خودا وساسه ئه‌وردا

دویه‌تم قه‌یری فکری کرد نویسا وه‌ ناو ده‌فتری "

«خدا در همه جا هست»این هم پایان انشاء

ڕزا جه‌مشیدی