شنه‌‌ى شه‌‌ماڵه‌ بازى وه‌‌ڵنگ ته‌‌ڕ

كه‌‌وك خوه‌‌ش كه‌‌لام‌ له‌ قوڵه‌‌ى كه‌‌مه‌‌ر

چڕى ئه‌‌و پيمان وه‌‌ت ‌له‌ كه‌‌له‌‌ى سه‌‌ر:

هه‌‌ڵسن له‌ خه‌‌و ياران كشمات

مزيانى بيه‌‌ن له‌ نوو خوه‌‌رهه‌ڵات

كه‌‌پوو وه‌ ‌نازه‌‌و نه‌‌رمه‌ په‌‌رواز كه‌‌ى

گوڵ خه‌‌نان له‌ شه‌‌وق خوه‌‌ر ده‌‌مى ‌واز كه‌‌ى

هه‌‌ناى گوڵ خه‌‌نى و / وه‌‌ڵنگ ‌له‌ په‌‌ل ‌دار

م چوى بنيشم / كز و كوور ژار

***

ئيواره‌ وه‌‌خته‌‌ زه‌‌وى لێڵه‌ گرتيه‌

مه‌‌ل و په‌‌له‌‌وه‌‌ر گشت لێزه‌ گرتيه‌

زه‌‌رده‌‌ى خوه‌‌ر بڕياس له‌ روى كه‌‌وره‌‌گان

پاسه‌‌وان شه‌‌و له‌ كه‌‌ل هاته‌‌و بان

كه‌‌وك خوه‌‌ش كه‌‌لام كشمات و بى‌ده‌‌نگ

وڵات پووشايه‌ خه‌ڵات يه‌‌ى ڕه‌‌نگ

شه‌‌مشه‌‌مه‌‌كووره‌‌ك وه‌ باڵ بى ‌په‌‌ڕ

جاى په‌‌روازيه‌ له‌ سايه‌‌ى بى ‌خوه‌‌ر

م ته‌‌نيا نيشم وه‌ مرايه‌‌وه‌

سفيده‌‌ى سه‌‌حه‌‌ر له‌ نوو بايه‌‌وه‌

ليسك خوه‌‌ر بيه‌‌ى له‌ شاخه‌ى داران

كه‌‌و بشاقنى له‌ سه‌‌ر نساران