قه‌ڵخان سه‌بر
واێ خه‌زان ڕووژان نه‌هات، له ناکاو
رویه‌و باخ و بوسانتان هه‌ڵیکه‌ید
ئاو ئه‌جه‌ل چووده گه‌لیو خاس و خراو
هه‌تمه‌ن حه‌ڵق و زوان ئیوه‌یش ته‌ڕ که‌ید
تێخ زوڵمتان درێژه جوور نه‌یزه
روژێ وه تێژی له مل خوه‌تانیش ده‌ید
بێ وه‌فا بی ئی دنیا ئه‌ڕا هاوار حه‌ق
ڕوژێ کاروان حه‌ق له لاتان بارگه خه‌ید
گوزه‌ر کرد نه‌ڕه‌ی شێران له مه‌مڵه‌که‌ت
زه‌مان گه‌فه‌ێ سه‌گ ئیوه‌یش خه‌فه که‌ید
گوم بی له وه‌رچه‌و تووز خار که‌و‌سوار
گیج گه‌ردوون خه‌ر ئیوه‌یش نوقم که‌ید
واێ ده‌وران خامو‌ش کرد شه‌م روشنایی
وه‌نه‌و‌به‌ی خوه‌ی، له چراخ ئیوه‌یش پف که‌ید
فره کاروان ڕه‌د کرد ئی کاروانسه‌را
بایه‌د کاروانه‌گه‌ی ئیوه‌یش ره‌د بکه‌ید
ئیوه دڵخوه‌شین، که ئیمه سیاچاره‌‌‌‌‌‌‌‌‌‌‌‌‌‌یم
سیاچاره‌گی، ئیوه‌یش وه‌ده‌رد خوه‌ی به‌ید
هه‌ر ڕوژگارێکه، سه‌ربه‌رزی سه‌رداران
ده‌ورانێک تێ، که نه‌مان ئیوه‌یش بوه‌‌ید
سه‌برم قه‌ڵخانه ئه‌ڕا تیر جه‌ورتان
تاموڵم، سه‌ختی که‌مانتان خه‌م که‌ید
ئی گوڵستانه ده‌مێکه ئه‌ڕا گشت
پایز، گوڵ ئیوه‌یش وه‌ده‌م خه‌زانه‌و ده‌ید
سروه‌ت و سامانتان ئه‌ین گوولئاوێکه
کافییه ئه‌و ئاوه یه‌کجار مه‌وج بییه‌ید
تو که په‌س دایده ده‌س گورگ وه‌ناو شوان
گورگه‌شوانه روژێک په‌س خوه‌تان خوه‌ید
فیل "فه‌نا" که شپرزه کرد شاه "به‌قا"
ڕوژێک پیاده‌کان ئیوه‌یش پاوڵا که‌ید
"سه‌یف" که ناوێک په‌یا کرد وه‌ی شیعره
روژێک خوه‌ێ له سه‌ر زوان ئیوه‌یش ده‌ید
نووسین: سه‌یفی فه‌رغان
ته‌رجومه: کاوه خوسره‌وی
2010-01-22
