من و گوچان ....
گوچان براده‌ر و ڕه‌فيق مناڵيم
من و ت هه‌ردوگ نه‌وه‌ى يه‌ێ ماڵێم
هه له مناڵى م دووسد داشتم
ريخ برايى م وه‌لدا ناشتم
يه‌ى بار م وه‌لدا ساوه له‌وان بويم
كه‌مى گه‌ورا بويم ئيجا گاوان بويم
گوچان له‌ده‌سم ئه‌به‌د نه‌وڕياێد
له‌خوه‌شى و ته‌نگى دايم هه‌ڵكردياد
ئيسه‌يش نه‌خوه‌شم كه‌فتگ بن ماڵم
ئه‌گه‌ر ت نه‌وێدن وه‌يلانه حاڵم
گوچان ت خاسيد تا قه‌وم و كه‌سم
ته‌نيا ت بوێده وه فرياد ڕه‌سم
هه‌ڵسم و نيشم شاند ها ژيرم
له ت زياتر م دى كى ديرم
ئه‌گه‌ر سێ گام بنه‌م ت چوار نايده
دايم م سوارم ت داوزياێده
گوچان سه‌ر له‌ليم ته‌واو شيويايه
ئه‌گه‌ر ت نه‌وێدن جه‌رگم بڕيايه
گوچان وه قوربان قه‌وچى قه‌مد بام
ئه‌ر له‌لێد قه‌وميا م وه نه‌زرد بام
ئه‌گه‌ر ت نه‌وێدن چه‌بكه‌م چه بويشم
له‌دويرێ باڵاد خراوه هووشم
له‌داخ دڵما فره كه‌ساسم
وه‌خته له‌داخا قت بوود هه‌ناسم
گوچان دى بچوو خودا لێد رازێ
دريژێ عومرد له‌ناو شادێ
هه له‌لاى ئاغاو قازێ و مير بوێد
له ئاگر و شكيان دايم هه دوير بوێد
(داود حه‌سه‌ن روسه‌م ئه‌ركوازى)
