چه‌ن دوبه‌يتييگ له كاك ره‌زای جه‌مشيدی
**************
چه‌نى له هيور مِ دادن وه لاده‌و
چه‌نى ئه‌سره‌يل مِ كه‌فتن وه پاده‌و
چه‌نى جوور كووانى داخ كريام
بچوو، واران ئه‌سره‌يلم وساده‌و
**************
چه سه‌رچوپى ئه‌زيزى كيشى يارم
ئه‌راى ديينى نه‌منيه دى قه‌رارم
كوره ده‌ردى وه ماڵ ئاسمان كه‌و
كه‌سيگ بويشى گه‌نه،چه‌وى درارم
**************
قه‌پى دامه له سيف ئه‌زره‌ته‌يلم
چه‌نيگه بى خه‌وه‌و بوينه چه‌وه‌يلم
مِ خو رووژم له بان تو له ده‌س دام
ئه‌را ره‌همى نيه‌كه‌يدن وه شه‌وه‌يلم
**************
هه‌وا ئه‌وره،ته‌مه،نِم‌نِم واران
چه‌وم هاله‌و ريد ساڵان و مانگان
هه‌يه زانم كِ نيه‌تيه‌يده‌و ديارم
ته‌مام ئه‌زره‌ته‌يلم چوو وه تاڵان
**************
شه‌واره هه‌م شه‌واره هه‌م شه‌واره
دڵم بيزه‌ى چه‌وه‌يلد كه‌ى دواره
خه‌وه‌ر دانه كه ديريدن تيه‌يده‌و
هه‌ناسه بڕكيم كه‌فته‌و شماره
شه‌واره هه‌م شه‌واره هه‌م شه‌واره
چه‌وه‌يلم بى خه‌وه‌و بينه دواره
مِ هه‌ر چى كه‌م رويد نايده‌و خياڵم
وه ناو هه‌رچى هه‌ساره‌‌يله دياره
**************
بنووڕه ته‌مته‌مه‌لويلان چه كه‌يدِن
بنووڕ چوى داره‌گانيش هه‌ڵكه‌نيدِن
ئه‌زيزم هاله رى ديرى تيه‌يده‌و
خوداگه ياره‌گه‌م وه پا نه‌خه‌يدِن
**************
وه ناو سه‌وزى وه‌هاران هه‌ر تو سه‌وزى
منيده شه‌مع هه‌ميشه پر له ئه‌سرى
وه‌لى هه‌ر كه‌س نه‌زانيدِن مِ زانم
تو ليمو زه‌رده‌گه‌ى باخه‌يل قه‌سرى
