شه‌فه‌ق نیوز/ نووسەر وروژنامەوان سامدار و بوێر، ماموستا ئەحلام مەنسوور عەلی ئەکبەر کەڵهوڕ، لە ساڵ ١٩٥١ لە گەڕەک عەبدوڵا بێگ لە شار خانەقین پەیا بویە و روزگار مناڵی لەورا گوزران کردگە، باوگی پیاویگ باڵابەرز و دڵپاک بویە، لە پاڵاوگە نەفتەگەی ئەڵوەن کار کردیاد، داڵگی ناوی رەسمیە بوی، لە هووز باجڵان.

ئەحلام نۆزگەی داڵگی بویە، هەر لە مناڵیەو زیرەکی وەپیەو دیاربویە، وەختا وەل باپیری ک باوگ داڵگیە، چیادە ناو بازاڕ، گووشگردیادە قسەیل، ولە باسەیل رەوشەگان خاس گووش تەکانیاد، ک بوینە بنمایەیگ لەناو هویری، تا لە هویری چەسپیا ک دەوڵەمەن هەس، نەداریش هەس، خاوەن دەسڵات هەس، بیچارەیش هەس، قسەی ئاشکرا هەس، فچەی ترسنۆکانە هەس، ستەم هەس، ستەمدیدەیش هەس، وزانست ک ژنەیل بایەسە وە کوڵەسویکەگانەو بچنە بازاڕ، وپیاوەیل لەناوڕاس جادەیلە ری بکەن، وزانست ک قسەکردن چەک قورسیگە، ژنو پیاو نێزانێد، وگەوراو بویچگیش نیزانێد.

ئەحلام مەنسوور، یەکەمین ژن ئه‌دیب ونووسەرە، لە گشت گەرمیان وەرەو باکوور، و لە گشت پارێزگای دیالە وەرەو باشوور. لە ساڵ ٢٠١٧ لە وەرز دویم ڤیستیڤاڵ تامەڕا، ک گشت ساڵیگ لە پارێزگای دیالە ئەنجام دریەێد، رەحمەتی ئیبراهیم خەیات، لە وتارەگەی ناو گشت ئەدیبەیل مردگ پارێزگاگە هاوەرد، ک ئەحلام مەنسوور تاقە ژنیگ بوی لە ناویان.

ئەحلام مەنسوور، بیجگە له‌ کوڵە چیرۆک و وتارەیل و باەوەتەیل ئەدەبی و رخنەیی لە چەن گوڤارو رۆژنامەی جیاجیا و رۆژنامەی هاوکاری، کۆمەڵە چیرۆک (پرد) و رۆمان ( ئەڵوەن) ئەرامان هێشتە جی.

ئەحلام لە خانەقین قۆناغ خوەنستن سەرەتایی و ئامادەیی تەواوکرد، لە ناوەندی خوەیو شەهید لەیلا قاسم بوینە برادەر، وبوینە دوس گیان وەگیانی، لە سەرەتای هەفتاگان، هەردوگیان چینە کۆلێژ ئاداب زانکۆی بەغداد، ئەحلام چیە بەش کوردی، لەیلا چیە بەش کۆمەڵناسی، هەردوگیان نیشتنە خود بەشە ناوخۆیەگەی دویەتەیل، لە ناوچەی وەزیریە، هویچ لەیەک جیاوە نەوین، بوینە نوێنەرەیل جوانیگ، ئەرا دڵسوزی ناوبەین خەڵک خانەقین، هاوخەم و هاو خەبات، کوردپەروەرییان وەیەکەو زیاترەو بوی.

دویای دەسگیرکردن لەیلا قاسم لەبەغداد، لە لایەن رژیم بەعس، لە وەهار ساڵ ١٩٧٤ ، ئەحلام وەزوی خەورەگە بڵاوکردە ناو گشت کۆلێژەیل و پەیمانگایل بەغداد. وەرجە ساڵ ١٩٧٢ ، ئەحلام بویە ئەندامیگ لەو کۆمەڵە روشنهویریە ک لەشار خانەقین دامەزریا.

دویای دەرچینی لە کۆلێژ، بویە نووسەریگ لە رۆژنامەی هاوکاری، ئەوە ک دەرفەتیگ زیاتر داگەپی، پەیوەندی وە فرە له‌ ئەدیب و نووسەر کورد بکەێد، و لە ئەزموونەیلیان سوود وەربگرێد.

دویای ئەوە لە ساڵ ١٩٧٧ ، دەزگای هاوکاری بوودە دەزگای روشنهویری وبڵاوکردن کوردی، سەروە وەزارەت روشنهویری عیراق، ژمارەیلیگ تر لە ئەدیبەیل کود تێنە دەزگاگە، ک بوودە باریگتر لە سود وەرگەردن ئەرا ئەحلام.

ساڵ ١٩٨٤ هەوڵ دەێد ک بڕوانامەی ماجستێر ودوکتۆرا لە زانکۆی سۆربۆن بارێد، لە سەر ئەرک خوەی روی کەێدە پاریس، دویای ساڵیگ، بیمار بوود و پویلی نیەمینێد، تیەێدەو ئەرا بەغداد، بەڵکم لەبان هۆکارەیلیگ سیاسی نێەتێدەو ئەرا سەر کارە وەرینەی خوی. 

ساڵ ١٩٩٠ لە کۆلێژ پەروەردەی زانکوی بەغدا بڕوانامەی ماجستێر وەرگرێد، وەلی سەختی رەوشەگە نیەلێد دکتۆرا وەدەس بارێد، دویای ئەوە شوی کەێد، بەڵکم ئی هاوسەریە ساڵیگ زیاتر وەپی نیەچوود، تا جیاوە بوون. 

ساڵ ١٩٩٥ ، ئەحلام لە بەغداوە روی کەێدە کوردستان، لە شار سلێمانی جیگربوود، لەورا جوور ماموستایگ وانەبێژ، لە زانکۆ سلێمانی کار کەێد.

لە دویا ساڵەیل تەمەنی، تەندروسیی تێکچوود، وتوانای كاری نامێنێ، تا روژ ١٠/١/٢٠١٣ لە روژیگ فرە سەرد ویەخ وه‌نان ، له‌ شوون بیماری سەختیگ، لە سلێمانی ماڵئاوایی یەکجاری کەێد. خود روژەگە تەرمەگەی تێەرنە خانەقین، ودویای داگردنی لە ماڵەگەی داڵگی لە مەزرەعە، بەنەی ئەرا قەورسان خدر زنە و نەنەی خاک.

سەرچەوە , ١٠٠ ناوداری کەرکوک و گەرمیان، عومەر عەلی شەریف.