مه‌ئمون به‌گ وه‌بی ئه‌وه‌گ گووش بيه‌ێد هويچ چشتيگ، ده‌سكرده‌ په‌لامارداين ده‌وڵه‌ت عوسمانی، دويای دوساڵ جه‌نگ و كيشمه‌كيش دوباره‌ مه‌رزه‌يل خوه‌رئاوای كوردستان، وه‌مانای(شارباژێر) و (هه‌ولێر) و (كۆيه‌) و (هه‌رير) و (ئامێدی) و (راوه‌ندز) گرته‌وه‌و حاكم و كاروه‌ده‌س ئه‌را گشتيان دانا.

بڕيگ له‌ له‌شكره‌گه‌ی جوور بنگه‌ی چه‌وديری و پاسه‌وانی له‌ راوه‌ندز دانا ئه‌را ئه‌وه‌گ له‌ هه‌ر شوونيگ وڵايه‌ته‌يل قه‌ڵه‌مڕه‌ويه‌گه‌ی كرفت و بشيوی روێ بيه‌ێد يه‌كسه‌ر هه‌وڵ بيه‌ن چاره‌سه‌ری بكه‌ن و كووتايی وه‌پی بارن.

٣٨ ساڵ وه‌و شيوه‌ فه‌رمانڕه‌وايی كرد و كه‌س نه‌تويه‌نست ده‌س بخاده‌ ناو مه‌مڵه‌كه‌تی، ئمجا وه‌ بوونه‌ی ئازايه‌تی و قاره‌مانێتی و زيره‌كی و دانايی ئی مه‌ئمون به‌گه‌و، هووز بنه‌ماڵه‌ی ئه‌رده‌ڵان وه‌(مه‌ئمونی)ناو ده‌ركردن ك له‌ كوردی خوه‌مان كورته‌وكرياگ مه‌ئمونه‌.

وه‌هه‌ر حاڵ مه‌ئمون به‌گ دويای ٣٨ ساڵ فه‌رمانڕه‌وايی، گشت كاروه‌ده‌س و ميره‌يل ولايه‌ته‌يل قه‌ڵه‌مڕه‌ويه‌گه‌ی له‌ باره‌گای خوه‌ی جه‌مه‌و كرد و ولايه‌ته‌يل قه‌ڵه‌مڕه‌ويه‌گه‌ له‌ناونی هه‌رسێ كوڕه‌گه‌ی خوه‌ی دابه‌ش كرد ك ناويان(يه‌كه‌ به‌گ) و(سورخاب به‌گ) و(محه‌مه‌د به‌گ) بوی.

ناوچه‌يل(زه‌ڵم) و (نفود) سپارده‌ كوڕه‌ گه‌وره‌گه‌ی ك ناوی (يه‌كه‌ به‌گ) بوی، و ناوچه‌يل (هه‌شلی – هشلی) و (پلگان) و (سنه‌ی ئمڕوو) و (قه‌ڵه‌مڕه‌ويه‌گه‌ی عه‌لی شكر) و ( ميهره‌بان) و (كه‌لاش) ك جوانڕو ئمڕووه‌، سپارده‌ (سورخاب به‌گ) و ناوچه‌يل(سرۆچك) و ( قه‌ره‌داغ) و (شارباژێر) و (ئالان) و (هه‌ولێر) و (كۆيه‌) و (ئامێدی) و (راوه‌ندز) دا ده‌س (محه‌مه‌د به‌گ) و ئامووژگارييان كرد ك وه‌يه‌كه‌و ڕيك و هاوكار بوون.

وه‌ل ئه‌وه‌يشال خوه‌يشی خوه‌يشی گووشه‌گير هه‌ڵوژارد و دويای يه‌ك ساڵ ماڵئاوايی يه‌كجاری له‌ دونيا كرد و مرد، ئمجا كوڕه‌يلی هه‌ر يه‌كيگ له‌ليان له‌ موڵك ميراتی و دياريكرياگ خوه‌ی خه‌ريك فه‌رمانڕه‌وايی بوين و حورمه‌تناين له‌(يه‌كه‌ به‌گ) برا گه‌وره‌يان و گووشگرتن له‌ قسه‌يلی وه‌ ئه‌رك زانستيان.

يه‌كه‌ به‌گ ٤٢ ساڵ وه‌ فه‌رمانڕه‌وايی و سه‌رپه‌رشيكردن برايه‌يلی برده‌ سه‌ر و له‌ ساڵ ٩٤٢ كووچی كووچ ئاخرين كرد و ماڵئاوايی يه‌كجاری له‌ دونيا كرد.

عه‌لی نه‌قی حسه‌ينی