مێژوو قوباديه‌يل
شه‌فه‌ق نيوز/ تيره‌ى قوبادى يه‌كيگه له تيره‌يل گه‌وراو گرينگ جاف جوانڕۆ، چه‌نه‌ها هووز و ئێڵ و بنه‌ماڵه‌ى جياجيا ئه‌گرێده خوه‌ى، رووڵه‌يل قوبادى وه گشتى مه‌ردمانيگن فاميده‌و ئازاو ئه‌نسافدار و مافپه‌روه‌ر و ره‌سه‌ن، چه‌ن سه‌رۆكيگيش له‌ناونيان هه‌ڵكه‌فتگه جوور: عه‌لی به‌گ، حه‌سه‌ن به‌گ، محه‌مه‌د ته‌قی به‌گ.
زێد و ماواى قوباديه‌يل ئه‌كه‌فێده ناونى زێد روسه‌م به‌گ جوانڕۆيه‌يل(له باكوور خوه‌رهه‌ڵات) و زێد وه‌ڵه‌به‌گى له باشوور خوه‌رهه‌ڵات و زێد قه‌ڵخانى له باشوور و ناوچه‌ێ ئه‌زگڵه و زێد باوه‌جانى و مه‌رز عراق له خوه‌رئاواوه.
تيره‌ى قوباديه‌يل له تاوسانان چيامه ناوچه‌يل ئاب و بازان و مله ترشكه و له زمسانيش كووچ وه‌ره‌و ناوچه‌يل ئه‌زگڵه‌و گاواره و قه‌يتول و ده‌ربه‌ند هۆڵ كرديان.
قوباديه‌يل پيكهاتنه له‌ى هووزه‌يله:
هووز قه‌لانى
ئى هووزه له 200 خيزان پيكهاتنه‌و له ناوچه‌يل باغ سه‌يخان و ئه‌زگڵه نيشته‌جيين و خه‌ريكن وه كاره‌يل كشتوكاڵى و باخدارى و ئمايه‌تكردن په‌س و پووڵه.
هووز كۆره‌يى
ئه‌يانه وه 200 خيزان مه‌زه‌نه كريه‌ن، له زمسانه‌يل چيانه ناوچه‌يل ئيمام حه‌سه‌ن و ئه‌زگڵه‌و له تاوسانانيش ره‌سيانه ناوچه‌ى ئاب.
هووز بازانى
ئه‌يانه‌يش وه نزيكه‌ى 220 خيزان مه‌زه‌نه كريه‌ن و هه‌وارگه‌ى زمسانه‌يان ناوچه‌ى گاواره بوى و له تاوسانيش كووچ كرديان وه‌ره‌و ناوچه‌ى بازان.
هووز میركی
له 180 خيزان پيكهاتنه و تاوسانان چيانه ناوچه‌ى بازان و له زمسانيش كووچ كرديان وه‌ره‌و ناوچه‌ى گارى.
يه‌يش بيجگه له هووز بابا، هووز پشتماڵه، هووز حه‌سه‌ن عه‌لى، هووز ته‌نگ ئه‌ژده‌هايى، هووز ئه‌لى ئاخه‌يى، هووز مه‌سور ئاخيى ك ئه‌يانه‌يش نزيكه‌ى 1000 خيزانيگ بوون.
مه‌حمود عه‌لى جه‌وهه‌ر
