هوز خزڵ
زوانیان كوردیه و زاراوه‌یان فه‌یلیه و له ئه‌نجام تێكه‌ڵ بوێنیان وه‌ل زاره‌وه‌یلتر كوردی ، ئمڕو جگى زاراوه‌گه‌یان وه‌ره‌و له‌كى چوگ.
زورم مه‌ردم عه‌شره‌ت خزڵ له ئێران له پارێزگاێ ئیلام نیشته‌جان و تائیسه‌یش وه‌زوان شرین كوردى قسه كه‌ن و له پارێزگاێ (كرماشان)یش له ناوه‌ند پاریزگاگه(كرماشان) و شار سونقور كولیایی ژیه‌ن.
له پارێزگاى لوڕسان ، هوز خزڵ له شار نه‌هاوه‌ند ژێه‌ن و وه‌زاراوه‌ێ شیرین له‌كى قسه كه‌ن و مه‌ردم ئێ هوزه له نه‌هاوه‌ند دو به‌شن ، به‌ش یه‌كم وه‌پێێان ئوێشن خزڵ سولكى ك له به‌ش خوه‌رهه‌ڵات شار نه‌هاوه‌ند نیشن و ئه‌و به‌شه‌گه‌ێتر وه‌پێێان ئوێشن خزڵ خه‌زائى ك له به‌ش خوه‌ر ئاواێ شاره‌گه ماوا گردنه.
به‌شێگ له هوز خزڵ له پارێزگاێ هه‌مه‌دان نیشته‌جان ك وه‌زاراوه‌ێ له‌كى قسه‌كه‌ن ، له‌وه‌ر ئه‌وه‌گ ئه‌و زاراوه له‌ى ناوچه زیاتر باوه ، خزڵه‌یل هه‌مه‌دان خوه‌یان وه كوچبه‌ر زانن و ته‌ئكید كه‌ن ك شوون ڕه‌سه‌ن خوه‌یان پارێزگاێ ئیلامه و له سه‌رده‌م ده‌سه‌ڵات ره‌زاخان له ئیلام وه‌زور هاوردنه‌سه‌یان ئه‌ڕا هه‌مه‌دان تا كونتروڵێان بكه‌ن ، چوێن مه‌ردم ئێ عه‌شره‌ته مه‌ردمان جه‌نگجو بوێنه و هه‌میشه له وه‌راوه‌ر ده‌سه‌ڵاتداره‌ێل سته‌مگه‌ر ئێران وسانه.
له سه‌رده‌م پادشاێ ئێران نادرشاێ ئه‌فشار ، به‌شێگ له مه‌ردم هوز خزڵ ئه‌ڕا پاراستن سنووره‌یل خوه‌ر هه‌ڵات ئمبراتورى ئێران له خوه‌ر ئاواێ ئێران ئه‌ڕا ناوچه‌یل خوه‌ر هه‌ڵات كوچ وه‌پێێان كریاس ، له‌وه‌ر ئه‌وه‌گ مه‌ردم ئازا و چه‌و نه‌ترس بوێنه ، له وه‌راوه‌ر ئه‌و هێزه‌یله ك په‌لامار خاك ئمبراتوری ئێران دانه.
له دیم خاك عراقیش هوز خزڵ له شاره‌یل و ئاوایه‌یل پارێزگایه‌یل واست و دیاله و كه‌ركوك و به‌غدا ، جور شاره‌یل به‌دره و زرواتیه و مه‌نه‌لی و خانه‌قى نیشته‌جان و ژماره‌ێگتریان له شار به‌غدا ماوا گردنه.
سه‌رچاوه كتاو ئه‌لفه‌یلیون
ج ك
