کاریگەری سروشت لە رووداوە مێژوویەگان
كه‌نعان حاته‌م/ لە ساڵ ٤٣ وەرجە زاینی، سەردەمیگ شیواشیو و ئاژاوە بوی ئەرا ناوچەی دەریای چەرمگ ناوڕاسین، ک کوشتن یۆلیۆس قەیسەر ئیمبڕاتۆڕ رۆمانی ، لە ململانەیگ لەبان دەسڵاتداری وەدریژایی ١٧ ساڵ، بویە هووکار رمانن کۆمار رۆمانی، و هەمیش سەردەم توخمارەی بەڵتەمی ک حکومڕانی میسر کۆنە کردیاد فەوتیا، تا ئیمبڕاتۆریەت رۆمانی لە شوونی باێد، ک زاڵەوبویە بان روبەر گەورایگ لە کناراو دەریاگە.
زەنجیرەیگ لە رووداوە سروشتیەگان و كەشووهەوا بویە هووکار لە ئاڵشتبوینیگ لە مێژوو مرۆیی ئەو وەختە، ک ساڵەیل ٤٣ و ٤٢ وەرجە زاینی وارانەیل فرە رفتیگ وەخوەی دی، و هەمیش سەردی فرەیگ، ک هیشت ورسگی و بیماری و خراوبوین بەرهەمە کشتوکاڵیەگان و ژاوەژاو فرەیگ بکەفێدە ناو مەردم، و شایەت تەقین بوڕکان ئالاسکای ئەمریکی هووکار ئەوانە بوی.
لە ناو به‌لگه‌نامه‌یل ک لە رۆژنامەی ئەکادیمی نیشتمانی بڵاو بوی، توێژینەوەکارەیل ئووشن ک شارستانیەتە کۆنە هێزدارەگان رووداوەیل سرووشتی بازی گەورایگ کرد لە ئاڵشت بوین رووداوە مێژووەگانیان، و تیمیگ لە زانا و مێژوونووس لە ری شیکردنەوەی خوەڵەوکوە بوڕکانیگ لەناو جەمسەر باکووری تویەنستن ژاوەژاو كەشوهەوا لە دەورگرد دەریای ناوڕاسین بوەسنە کوڵانن بوڕکان ئۆکموک لە ئەلاسکا ساڵ ٤٣ وەرجە زاینی.
ئی رووداوە سروشتیەیلە هیشت دوو مەمڵەکەت لە باکوور و باشوور دەریای ناوڕاسین بڕمیەێد، ئەوە ک مێژوو نووسەیل دویننەی وانەی خوەنەواری گونجیاییەگە ئەرا بەراوردکردنی وەل دەور پەتای کۆرۆنا لە دروسکردن مێژوو هاوچەرخ، و هەمیش دیارخەێد چەنیگ بەشەیل جهان وەیەکەو گریەبەسن، تەنانەت وەرجە زیاتر لە دوو هەزار ساڵیش.
هووکارەیلیگ فرە هیشتن کۆمار رۆمانی بڕمیەێد، بەڵکم کوڵانن بورکان ئۆکموک و ئاڵشتبوین كەشوهەوا جوور پووشەگە بوی ک پشت کۆمار رۆمانی و مەمڵەکەت میسری بەلتەمی شکان، ک هەردوگیان لە رەوش سەختیگ گوزران کردیان لە سەرکردایەتی خراو و جەنگ و پیلانەیل ناوخۆیی و لافاو.
لە ساڵ ٤٤ وەرژە زاینی، کۆمار رۆمانی کۆن لە کنار رمانن بوی، دویای دەیان ساڵ لە شەکەتی سیاسی و ئابووری ک لە مێژوو وەپی ئووشن " قەیرانەگان کۆمار رۆمانی" و كەشووهەواگە رەوشەگە زیاتر خراوکرد، و لەمەوقەی تەقین بورکانەگە دووکەڵەگە لە ئاسمان نوای تیشک خوەرەگە گرد، ک وەناکاوەو بویە كه‌شوهەوایگ سەردیگ و زەنجیەرەیگ لە هووکار كەشوهەوا.
مێژوو نووسەیل یۆنانی و رۆمانی کۆنەگان شیوەیگ فرە تاریک لە ساڵە سەردەگان کیشان، و زاناگان نووسین ک هەوای یەخین و بیماری و کەم خوارەمەنی هیشت رەوشە سیاسیە ئاژاوایەگە خراوترەو بوود تا کۆتایی وە کۆمارەگە هاورد، وری کردەو ئەرا حکومڕانی ستەمدار لە شوونی.
ماکۆنیل ئەکادیمی بەشدار لە توێژینەوەگە وت: لە نووڕستنیگ ئەرا رەوشەگان، شایەت كەشوهەوا توندەگە ک لە تەقین بوڕکان ئۆکموک پەیا بوی کاریگەری داشتگە لە بان بەشیگ له رووداوە مێژوویەگان، وتیش: لە وەختیگ ک ئاسان نیە دووپات بکەیمن لە ئاست کاریگەری بوڕکانەگە وە شیوەیگ راستەخۆ لە بان رمانن کۆمارەگە، بەڵکم دیارە ک ئەوە بویە، و توێژینەوەکارەیل دوینن ک دوو ساڵەگە لە پشت تەقین بوڕکانەگە سەردترین ساڵه‌یل بوی لە نیم باکووری زەوی ئەرا ماوەی ٢٥٠٠ ساڵ.
