شه‌فه‌ق نیوز / کۆشکیگ لە ئەفسانە وەبانتر
کۆشک نۆیشڤانشتاین لەبان لووتگەی کویگە دروس کریاگە، نزیک ناوچەی هۆهینشفانگاو، وەفەرمان شاه باڤاریا، لە ئەڵمانیا، لۆدفیگ دویەم، ساڵ ١٨٦٩ تا بوودە کۆشکیگ نمونەیی، تا ١٨٨٦ کار لەلی کریا، ک دروس کریا تا بوودە قەڵای سوارەیل لە سەردەمەیل ناوڕاس.
لە تەمەن ١٨ ساڵی لۆدفیگ دویەم بویە شاه لەبان باڤاریا، وەلی زوی دڵی هاتە تەنگ لە رێوشوێنە تیژەیل چواردەوری، ولەکەینوبەین ناونی سیاسیەگان وپلانەیل ژیروەژیری، شاه پەنا بردە میوزک و نەقشەیل بونیاد، و هەرلەمناڵی تک ئەو شاخە لە هۆهینشفانگاو ناسێد.
وەرانوەر نویشفانشتاین کۆشک هۆهینشفانگاوە، ک لۆدفیگ و براگەی تاوسانەگان وەخت مناڵییان لەورا بردیانە سەر، ودیارە ک ساختمانەگە وهەرسگ تاوەرە خڕەگانی فرە کارەگەری داشتیە لەبان وردەکاری بونیاد لەلاین لۆدفیگ، و شیوەی کۆشکەگە کریاگە جوور نمونەی شازادە خەفتگەگە لە فیلم دیزنی ساڵ ١٩٥٥ .
چوینكە خوەی فرە خوەشی هاتگە لە مۆسیقار ریچارد فاگنیر ئەراوە شاه لۆدفیگ دویەم کەفتە ژیر کارەگەری سینارۆەیل ئۆپڕا، ک پڕن لە ئەفسانەیل پاڵەوانەیەل جرمانی، ئەراوە ئەرک خستە بان (کریستیان ) ک دیزانەر شانۆیە تا سەرتای پەنجەیل بخەێدە بان کۆشک هۆهینشفانگاو ، وەی جوورە پشتینەی شانۆی ئۆپڕا لەناوی دیارە.
وەگەرد کارەگەری ئۆپڕا، گشت ژووریگ لە کۆشکەگە باس ئەفسانەیگ وەجیا کەێد، گەوراترین ژوورەگان خوەی هۆڵ گورانیەگەس، ولە تیوڵ کۆشکەگە هەمیش شانۆیگ هەس، بەڵکم هویچ لەبانی هەل نەکریاگە، لۆدفیگ نیاز داشت٢٠٠ ژوور لەناو کۆشکەگەی دروس بکەێد، وەلی تەنیا ١٤ لەلیان تەواو بوی.
لەبان نمونەی ئەشکەفتەیل ژیرین، لەناو کۆشک هۆهینشفانگاوە ئەشکەفت کاردەسییگ کریاگە، ک وەرنگەیل روشناوە کریەێد، تەنانەت یەک تاڤگەیگ راستەقینە لەناوی بویە، ئی ئەشکەفتە جوور ئەشکەفتیگ لەکویەی هۆرزێل کریاگە، ک هاناو ئەفسانەی تاهینویزەر.
شوین خەفتنەگەی لۆدفیگ جوانکاری کریاگە وە هەڵکوڵینەیلیگ ورد، وەوردی پەسەن کریانە، کتاوەیل مێژو ئویشن ک پەیکەرتاشەیل چوار ساڵ کار لە وردەکاری ئەو ژوورە کردنە.
لە ١٢ حوزەیران ١٨٨٦ گشت دەسڵاتەگان لۆدفیگ دویەم فەوتیان، ولەناو کۆشکەگە گیرهات، دویای روژیگ خوەیو پزشکەگەی وە مردگی لەناو دەریاچەی شتارنبیرگەر دینەو، ک هۆکار مردنی هیمان نادیارە.