شه‌فه‌ق نيوز/ به‌هرام قاسمى قسه‌كه‌ر وه‌ناو خارجيه‌ێ ئيرانى، سياسه‌ته‌يل يه‌كلايه‌نه‌ و ده‌خاڵه‌تكارى و دوشمنى و داگيركارى و جه‌نگ و پاكسازى ره‌گه‌زى و ترۆر وه‌ هووكار بنه‌ڕه‌تى ته‌هريبكردن ئاده‌ميزاد تاريف كرد و ئه‌مريكاو هاوپه‌يمانه‌يليشى وه‌ ئه‌وه‌ باسكرد ك ده‌س له‌ زوورم ئى كاره‌يله‌ ديرن.

قاسمى وه‌ تونى جواو ئه‌و راپۆرته‌يل ئه‌مريكيه‌ داره‌و ك وزاره‌ت خارجيه‌ێ ئه‌مريكى دژ ئيران قسه‌ كرد له‌باره‌ى ته‌هريب ئاده‌ميزاد و وت: ئيچنه‌ راپۆرته‌يليگ مه‌رامداره‌و له‌بان پێوه‌ر مزده‌وه‌ج و سياسى بنيات نرياگه‌و ئه‌را شكانن ئومعه‌ت ئيران.

قاسمى وت: تومه‌ته‌يل وزاره‌ت خارجيه‌ێ ئه‌مريكى هويچ بنه‌مايگ نه‌يرێد و ئيران په‌يڕه‌و ئايين و رينمايى ئسلام ئه‌كا له‌ بوار و پله‌ێ پشتگيرى له‌ ئاده‌ميزاد و ئه‌نجومه‌ن شوراێ ئسلامييش وه‌ په‌سه‌نكردن ياساێ دژه‌ ته‌هريب ئاده‌ميزاد ديارى و په‌سه‌ن سزا له‌بان گشت جووره‌ ديارده‌يليگ له‌و جووره‌ كرد.

جى باسه‌، خارجيه‌ێ ئه‌مريكى له‌ى دوياخره‌ راپۆرتيگ بڵاو كرد له‌ باره‌ى بازرگانيكردن وه‌ دويه‌ت و ژنه‌يل ئيرانى و بردنيان له‌لايه‌ن چه‌ته‌يل بازرگانيكه‌ر وه‌ ئاده‌ميزاد ئه‌را ده‌وڵه‌ت و ناوچه‌يليگ له‌وانه‌يش پاريزگاێ سلێمانى و ئيمارات و پاكستان و ئه‌فغانستان، ك وه‌رپرسيارێتى ئى كاريشه‌ خسته‌ بان ته‌هران.