ته‌هران مه‌رجه‌يل خوه‌ى ئه‌را دانيشتن وه‌ل واشنتۆن دانا
2019-07-04 16:33:06
شه‌فه‌ق نيوز/ مه‌حمود عه‌له‌وى وه‌زير ئه‌من ناوخوه‌يى ئيرانى، دو مه‌رج دانا ئه‌را ئه‌نجامداين گفتگوو له‌ناونى ته‌هران و واشنتۆن ك پيكهاتنه له لاوردن سزايه‌يل ئه‌مريكى له‌بان ئيران و خود عه‌لى خامه‌نه‌يى رابه‌ر باڵاى ئيرانى، جوور ئه‌وه‌گ ئاژانس كۆمار ئسلامى ئاماژه وه‌پيكرد.
له‌و باوه‌ته‌و، عه‌له‌وى وت: ئيران ئه‌تويه‌نيد تاووتوێ هوير و رايه‌يل خوه‌ى بكا له له‌وه‌رگرتن ئه‌نجامداين گفتگوو وه‌ل ئه‌مريكا، وه‌لێ ئه‌وه‌يش له حاڵه‌تيگ ك تره‌مپ ئه‌و سزايه‌يله هه‌ڵگريد و ره‌زامه‌نى عه‌لى خامه‌نيى رابه‌ر باڵا له‌ى گفتگووه وه‌ربگيريه‌ێد.
جى باسه، وه‌زير ئه‌من ناوخوه‌يى ئيرانى باس له‌وه‌يش كرد ك ئه‌مريكيه‌يل فريه ترس له هيز سه‌ربازى ئيرانى داشتنه‌و يه‌يش له‌يوا وه‌پيان كرد په‌لامار ئه‌را بان ئيران هه‌ڵوه‌شننه‌و.
