ماكرۆن: چشته‌يليگ له چين له‌بان كۆرۆنا هه‌ن ئيمه نازانيمنه‌ى
شه‌فه‌ق نيوز/ ئيمانۆيل ماكرۆن سه‌رۆك فره‌نسا، باس له‌وه كرد كه‌لينيگ هه‌س له ئداره‌ى چين ئه‌را قه‌يران ڤايرۆس كۆرۆناى تازه و ئه‌را رووژنامه‌ى "فاينانشاڵ تايمز" وت: چشته‌يليگ هه‌ن ئيمه نازانيمنه‌ى.
ماكرۆن له ديمانه‌يگ و له جواودانه‌وه‌ى پرسياريگ له‌باره‌ى تواناى رژيمه‌يل سته‌مكارى له‌بان ئداره‌ى ئيچنه قه‌يرانه‌يليگ وت: ئاشكراسه ك چشته‌يليگ هه‌ن و رويدانه و ئيمه نازانيمنه‌ى.
ماكرۆن جوور ئه‌وه‌گ ئيليزيه باس كرد، ئاماژه وه ئه‌وه كرد ئداره‌كردن قه‌يران له ديموكراسيه‌ت ك ئازادى زانيارى و گوزارش زه‌مانه‌ت ئه‌كا، بايه‌سه نه‌رم بدێ و جى تاووێكردن بدێ وه‌چه‌واشه‌ى ئه‌و رژيمه‌يله ك ده‌سكارى زانيارى و گوزارشه‌يل ئه‌كه‌ن.
جى باسه، ماكرۆن يه‌يش ده‌رخستگه ك مامڵه‌كردن په‌كين وه‌ل قه‌يران ڤايرۆس كۆرۆنا جى گومانه جوور ئه‌وه‌گ له‌نده‌ن و واشنتۆن باس له‌لى كردنه ك گوايا په‌كين مه‌ترسى په‌تاگه له سه‌ره‌تاى كه‌فتنه‌وه‌ى شارده‌سه‌و.
