شه‌فه‌ق نيوز/ له‌ په‌لامار تازه‌يگ ئه‌را بان ئيران، ئيجاره‌ عه‌لى خامه‌نه‌يى رابه‌ر باڵاى ئيرانى گيرياسه‌ ئامانج و له‌لايه‌ن مير محه‌مه‌د بن سه‌لمان وه‌ليعه‌هد سعوديه‌و وه‌"هتله‌ر تازه‌"يگ تاريف كريا وه‌ ئه‌وه‌گ جى وه‌خشين نيه‌.

مير محه‌مه‌د له‌ باسيگ وه‌ل توماس فريدمان رووژنامه‌نويس ئه‌مريكى ك له‌ رووژنامه‌ى نيويۆرك تايمز بڵاو كريا، وت: رابه‌ر باڵاى ئيرانى هتله‌ر تازه‌يگه‌ له‌ خوه‌رهه‌ڵات ناوين و ئيمه‌يش ده‌رسيگ له‌ ئۆرپا وه‌رگرتيمنه‌ ك سياسه‌ت رازيكردن هويچ سووديگ نه‌يرێد و ئيمه‌يش ناخوازيم هتله‌ر ئيران دوباره‌ بدێده‌وه‌ له‌ خوه‌رهه‌ڵات ناوين جوور ئه‌وه‌گ روێدا له‌ ئۆرپا.

جى باسه‌، مير محه‌مه‌د له‌باره‌ى خواست روى وه‌ڕوى بونه‌وه‌ى ئيرانيش له‌ ناوچه‌گه‌، وت: مه‌سه‌له‌ى گرينگتر ئه‌وه‌سه‌ ك سعوديه‌ ئه‌نجامى ئه‌ياد له‌ ناوخۆ ئه‌را بنياتناين هيزه‌گه‌ێ و ئابووريه‌گه‌ێ.