شه‌فه‌ق نيوز/ نرخ نه‌فت كه‌ميگ به‌رزه‌وبوين وه‌خوه‌يه‌و دێ، ئه‌ويش دوياى رووژيگ له‌ داوه‌زينى ئه‌را كه‌مترين ئاسته‌يلى ك 18 ساڵه‌ وه‌و جووره‌ داوه‌زين تۆمار نه‌كردگه‌، ئه‌ويش وه‌ل پته‌وكردن گامه‌يليگ له‌لايه‌ن بڕيارده‌ره‌يل ئه‌را پشتگيرى له‌ ئابوورى جه‌هانى ك زه‌ره‌دمه‌نه‌ وه‌ بوونه‌ى بڵاوبوينه‌وه‌ى ڤايرۆس كۆرۆنا.

نرخ نه‌فت خام ئه‌مريكى" خام تكساس"وه‌ ريژه‌ى 7،3% به‌رزه‌و بوێ و هه‌ر به‌رميليگى ره‌سيه‌ 21،5 دۆلار، وه‌لێ نه‌فت خام برينت وه‌ ريژه‌ى 3،3% به‌رزه‌و بوێ و هه‌ر به‌رميليگى وه‌ 23،5 دۆلار مامڵه‌ وه‌پيه‌و كريا.

جى باسه‌، بازاره‌يل نه‌فت جه‌هانى داوه‌زينيگ وه‌خوه‌يه‌و دێ دوياى ئه‌وه‌گ حكومه‌ته‌يل جه‌هان رێ وشوون داخستن ته‌واويگ ئاشكرا كردن له‌وه‌ر رێگرى له‌  بڵاوبوينه‌وه‌ى ڤايرۆس كۆرۆنا، ك يه‌يش بويه‌ هووكار داوه‌زين داواكارى له‌بان نه‌فت خام.