شه‌فه‌ق نيوز/ عه‌لى ره‌زا زالى سه‌رۆك ليژنه‌ى نيشتمانى ئيرانى ئه‌را له‌ناوبردن ڤايرۆس كۆرۆناى تازه‌ له‌ ته‌هران وت: شار ته‌هران وه‌ ته‌واو تويش ڤايرۆس كۆرۆنا بويه‌، وشدارييش دا له‌باره‌ى كاره‌سات له‌و باوه‌ته‌و له‌ حاڵه‌تيگ ئه‌گه‌ر مه‌ردم شاره‌گه‌ پابه‌ند نه‌ون وه‌ مه‌ندنه‌وه‌ له‌ ماڵ.

زالى له‌ ديمانه‌يگ وه‌ل كه‌ناڵ خه‌به‌ر ته‌له‌فزيۆنى وت: جى داخه‌ پشگووشخستن بڕيگ كه‌س بويه‌سه‌ هووكار پيسبوين گشت به‌شه‌يل ته‌هران پايته‌خت وه‌ ڤايرۆس كۆرۆنا.

له‌و ديمانه‌ سه‌رۆك ليژنه‌ى نيشتمانى ئيرانى ئه‌را له‌ناوبردن ڤايرۆس كۆرۆنا وشدارى دا ئيرانيه‌يل و مه‌ردم ته‌هران له‌باره‌ى ده‌رچگن له‌ ماڵ و وت: له‌ حاڵ حازر وه‌ گووره‌ى توێژينه‌يلمان ئه‌وه‌ ده‌ركه‌فتگه‌ ك گشت ناوچه‌يل ته‌هران تيكه‌ڵ وه‌ل ڤايرۆس كۆرۆنا و هويچ ناوچه‌يگ پاك له‌تى نه‌يريم.