شەفەق نیوز/ دکتۆر ئەدهەم ئیسماعیل نوێنەر رێکخراو تەندروسی جهانی لە عراق، ئمڕوو پەنجشەممە، ئاشکرا کرد ک دەرمانە روسیەگە ک تایبەتە وە ڤایڕۆس کۆڕۆنا، ئەوەگ بەغداد لەبانی دانوستان کەێد ئەرا هاوردنی، موڵەت وەکارهاوردن جهانی نەیرێد.
ئیسماعیل ئەرا ئاژانس شەفەق نیوز وت: دەرمانەگە لە زاڵبوون مردنی کەمەوکەێد، وەگورەی تاقیكاریە باسکریایەگان، ولە تووشهاتنەگان کەمەو نێەکەێد، ودووپات کرد ک تا ئی ساعەتە موڵەت ئەرا وەکارهاوردن جهانی نەێرێد، وتەنیا لەلایەن چەودێری دەرمانی روسی موڵەتدارە، وەلی موڵەتدار ناودەوڵەتی نیە، هرچەن روسیا داوای هەناردەی دەرمانەگە ئەرا دەور ١٠ دەوڵەت وەرگردیە ك عراق یەکیگیانە.
وتیش؛ رێکخراو تەندروسی جهانی لە توێژینەوەگانی تا ئیسە نەڕەسیەسە ئەنجام له‌ سەرکەفتن دەرمانە روسیەگە، تەنیا لە ری روسیا خەوردار کریایمنە گوایە دەرمانەگە ئەنجامیەل خاسیگ دیرێد لە کەمەوکردن مردن، بەڵکم ئی کارە مینێدە بان تاقیكاریەگان لەلایەن تەندروسی جهانی.
نوێنەر رێکخراو تەندروسی جهانی دیاری کرد؛ عراق توێەنێد ئی دەرمانە وەکاربارێد لە تاقێەگەیل نه‌خۆشخانە، وەمەرجیگ ک هاوردنەگە کەمبوود، و وەمەبەست تاقیکردن، نەگ ئەرا وەکارهاوردنی لەبان گشت هاووڵاتیەیل.
عەبدرەحمان حسێنی باڵوێزە روسیەگە وت؛ بانگەوازی ئه‌را وەزارەت تەندروسی روسیا کردگە، تا دانوستان لەباوەت سود عراق لە دەرمان ئەڤیاڤاڤیر ئەرا چارەسەری کۆڕۆنا بكه‌ن.
وتیش؛ دەرمانەگە چارەسەری ٩٠ لە سەد تووشهاتگەیل بیماریەگە چەسپان.
ئەڤیاڤاڤیر دەرمانیگ یابانیە ئەرا چارەسەری تووشهاتگەیل ڤایڕۆس کۆڕۆنا، وەگورەی وتارەیل فەرمی ، لە روسیا گەشە وەپی دریا وە سەرپەرشتی حکومەت.