خوه‌ينيشانده‌ريگ له به‌غدا كوشياو يه‌كيگيش ده‌سگير كريا
شه‌فه‌ق نيوز/ سه‌رچه‌وه‌يگ له پۆليس عراقى ئاشكراى كوشيان خوه‌ينيشانده‌ريگ كرد وه بۆمبيگ ئه‌سرڕشن ك وه‌ر سه‌رى كه‌فتگه وه‌تايبه‌ت ده‌مچه‌وى له مه‌يدان خه‌ڵانى له‌ناوڕاس به‌غداى پايته‌خت.
ئه‌و سه‌رچه‌وه ئه‌را شه‌فه‌ق نيوز وت: هيزه‌يل دژه بشيوى له ده‌مه‌و شه‌وه‌كى ئمڕوو بۆمب ئه‌سرڕشن وه‌ره‌و روێ خوه‌ينيشانده‌ره‌يل ته‌قاننه ك جيگير بوينه له‌ناو بنايه‌يل ناوچه‌ى خه‌ڵانى و وه‌ر خوه‌ينيشانده‌ريگ كه‌فتگه له ده‌مچه‌وى و يه‌كسه‌ر گيان له‌ده‌سداگه.
سه‌رچه‌وه‌يگ تر ئه‌منى وت: جايه‌ڵيگ وه ماتۆڕسكڵيگه‌و ده‌سگير كرياگه ك ده‌مانچه و ناسنامه‌يل لايه‌نيگ ئه‌منى وه‌پى بويه‌و هه‌وڵ ئه‌وه داگه بچێده ناو مه‌يدان ته‌حرير له ناوڕاس به‌غداى پايته‌خت.
سه‌رچه‌وه ئه‌منيه‌گه هه‌ميش وت: ئه‌و جايه‌ڵه يه‌كسه‌ر دگان وه ئه‌وه‌يا ناگه ك ئامانجى ئه‌وه بويه ته‌قه بكا له هيزه‌يل ئه‌منى و له خوه‌ينيشانده‌ره‌يل.
