شەفەق نیوز/ ئمڕوو دووشەممە، ئیران باس لە ئامادەبوین هەمیشەیی کرد ئەرا گفوگووکردن وەگەرد گشت دەوڵەتەیل ناوچەگە، ئەرا چارەسەرکردن بەد رەسینەوە له‌ یه‌كتر و ململانیەگان.
عەباس موسەوی قسەکەر وەناو دەرەوەی ئیران، ک یاوەر محمد جواد زەریف وەزیر دەرەوەی ئیران بوی لە سەردانەگەی دویەکە ئەرا عراق، وت: لە باوەت سعودیە، فرەجار باسکردیمن لە رەنجەیل و سیاسەتەیل بنەماییمان لەی باوەتە، و ئەوە مینێدە بان حکومەت و وەرپرسەیل ئی وڵاتە '' سعودیە'' چوون و چ بۆچونیگ وەڵام هەلەگەمان دەن لە هاوکاری و دانوستان هەرێمی.
وتیش؛ کۆمار ئیسلامی هەمیشە ئامادەیە ئەرا دانوستان و هاوکاری وەگەرد گشت دەوڵەتەیل ناوچەگە، و هەمیشە ئارامی و ئاشتی لە ناوچەگە خواستیە.
هه‌میش دووپاتکرد؛ لە گفتوگۆکردن زیاتر هیچ چارەسەریگ ئەرا یەکلاوەکردن ئاشتیانە لە بەد رەسینەوە و ململانیەگان نیە ، و باوڕ دیرێمن ک چارەسەرییگ لەیە خاستر نیە.
وتیش: لەبان ئی رەوشەیلە، ئیران هەمیشە بڕوا دیرێد وە گفوگووکردن ناونی دەوڵەتەیل ناوچەگە، دویر لە دەسوەردان بیگانە، چوونکە خوەی تەنیا رییگە ئەرا ئەرامکردن ناوچەگە و هاوردنەوەی ئاسایش، تەنانەت خاسەوبوین ئابووری ناوچەگە.
عەباس موسەوی هەمیش باسکرد؛ ک بوین ناوچەی ‌هێزداریگ کار گرنگیگە ئەرا ئیران. ئەگەر ناوچەی وەهێزیگ بیاشتایمن، خو ئیمە دەوڵەتەیلیگ وە هێز دیریمن و توێەنیمن وەگەرد یەک هاوکاری بکەیمن، و تەهران هیمان باوڕ وە رینمای گفتوگوو و هاوکاری دیرێد.