شەفەق نیوز/ پسپۆڕ ستراتیژی سیاسەته‌یل ئاو لە پارێزگای دهۆک لە هەرێم کوردستان، ئمڕوو چوارشەممە، ئەرا کەمەوکردن لە زەردەیل پەنگەوداین ئاو تورکیا لە بەنداو گەپ ئیلیسۆ، پێشنیار دروسکردن بەنداوەیل لقەیی لە بان رووبار دیجلە خستە وەرچه‌و.
رەمەزان حەمزە پسپۆڕ ستڕاتیژی و سیاسەتەیل ئاو لە پارێزگای دهۆک ئەرا ئاژانس شەفەق نیوز وت؛ راگەیانن تورکیا وە پەنگەوداین ئاو لە بەنداو ئیلیسۆ کارگەریەیل خراو ئەرا بەنداو موسیل دیرێد، ک رێژەی پەنگەوخواردن ئاو لە بەنداو موسل رەسێدە دەور ٧ میلیار میتر شەشپاڵو، بەڵکم هەنای تورکیا ئاو دیجلە گلەودەێد، فیشتر لەنیمەی داوەزێد.
حەمزە دیاری کرد، بەنداو موسل ستراتيژی خوەی ئەرا پەنگەوداین ئاو گوماکەێد، ک پارێزگایل ناوڕاسو باشوور پشت وەپی بەسانە لە کشتوکاڵ و خواردن، ورێژەی ئاوەیل تاف لە رووبار دیجلە ٣٦٠شەشپاڵوە لە چرکەیگ، ئەوسا کەمەوبوود ئەرا ٦٠ شەشپاڵو لە چرکەیگ ئەگەر بەنداو ئیلیسۆی تورکی بکەفێدە کار.
لەباوەت ئەو کێشەیلە کە هەرێم کوردستان وەرانوەریان بوود، حەمزە باس کرد، ک دهۆک یەکەمین زەردمەن بوود، چوینکە ئاو خواردن وەشیوەیگ گەورا هابان رووبار دیجلە، و پارێزگاگە تەنیا کەفێدە بان رووبار خابور، ک پەلیگە لە رووبار دیجلە.
پسپۆڕە ستڕاتیژەیەگە پێشنیارکرد ک عیراق بەنادوەیل لەبان پەلەیل دیجلە دروس بکەێد، وداوا لە ئەنقەرە کرد وەگورەی گریەبەسەیل نیەودەوڵەتی بەشێگ له‌ ئاوەگە وڵ بکەێد.
رەجەب تەیب ئۆردوگان سەرۆک تورکیا، لە دویای کۆبونەوەی هافتانەی ئەنجومەن وەزیران، دویکە سێشەممە ١٢ ئایار ٢٠٢٠ ، لە دەسوەپیکردن وەکارخستن یەکمین تۆربین لەبان بەنداو ئیلیسۆ لە هەفتەی هاتگ خه‌وه‌ردا و لە وتارەگەی وت؛ لە ١٩ ئایار دەسکەیمنە وەکارخستن یەکیگ لە ٦ تۆربینەیل بەنداو ئیلیسۆ، ك یەکیگه‌ لە گەوراترین پڕۆژەیل ئاوداین و به‌رهه‌مهاوردن وزە.