شەفەق نیوز/ پەڕلەمانتار هۆشیار عەبدوڵا، ئمڕوو شەممە، داوا لە وەزیر دەرەوەی نوو کرد، فڕۆکەیگ ئەرا ها,ردن عیراقیە گیرهاتگ لە مەغریب و تونیس رەوانە بکەێد، دیاریش کرد ئەوان قەیری هاوار کل کردنە وەرژەیەگ پویلیەیان تەواو بوود.
عەبدوڵا لە بەیاننامەیگ ئمڕوو وت؛ لە وەختیگ گشت وڵاتەیلە مەردم گیرهاتگ خوەیان لە وڵاتەیلیگ تر بردنەو، دویای وسانن جویلەی فڕۆکەگان وەبونەی پەتای کۆڕۆنا، هیمان بڕیگ لە عیراقیەیل لەدەیشت چەوەڕی حکومەتەگە کەن ئەرک وە بان گەردن خوەیان هەڵگرن وەکاروانیگ تایبەت ئه‌را هاەردنەوەیان كل بكه‌ن.
وتیش؛ ٣٥ عیراقی هانە مەغریب، ٣٠ تریش هانە تونیس، وەدیرکەفتن هاتنەوەیان وەهۆی پەتای کۆڕۆنا گشت پویلەیلیان خەرج بویە، و ئەرک حوکومەتەگەمانە ک وەزویترین وەخت بارێدەیانەو ئەرا عراق، ئەرا زانیارییش ئیمە وەرژەیە داواکاری داشتیمن ئه‌را وەهاوردنەوەیان وەلی گوشگەر نەویە.
عەبدوڵا هەمیش وت؛ ئەگەر ئی حکومەتە وەڕاسی حکومەت هاووڵاتیەیلە جوی ئەویگ ک ئویشن، با لە ری هاوردنەوەی عیراقیه‌یل گیرهاتگ له‌ دەیشت خوه‌ بسه‌لمنێ، تەنانەت ک حاڵیان لە بڕیگ وڵاتەیل فرە خراو بویە و شەرمە ئەرا حکومەت عیراق لەی ئەرکە شکست بارێد.
وجەختیش کرد ک گرنگە ئەگەر یەکەمین کارەیل وەزیرە نووگە یە ئەنجام بەێد وە رەوانە کردن کاروانەیل ئاسمانی تایبەت وە هاوردنەوەیان.
لە وەخت دیاربوین ڤاێڕۆس کۆڕۆنا لە عیراق، حکومەت فیدڕاڵی بڕیار وسانن کاروان ئاسمانیەیل داد، وەلی کاروانەیلیگ تەرخان کرد ئەرا عیراقیەیل دەیشت وڵات، ئەوانەگ خوازن بانەو ئەرا عراق.