عراق ده‌روازه‌ى مه‌رزێ قائم وه‌ل سوريا واز ئه‌كا
2019-09-30 08:59:07
شه‌فه‌ق نيوز/ عراق خوازياره ده‌روازه‌ى مه‌رزێ قائم وه‌ل سوريا واز بكا، ئه‌ويش له تازه‌ترين ئاماژه‌يگ له‌بان جيوه‌جيكردن په‌يوه‌نديه‌يل له‌ناونى به‌غدا و حكومه‌ت به‌شار ئه‌سه‌د سه‌رۆك سوريا.
زويتريش له‌ى باوه‌ته‌و، عادل عه‌بدولمه‌هدى سه‌رۆك ئه‌نجومه‌ن وه‌زيره‌يل، ره‌زامه‌نى ده‌رخست له‌بان وازكردن ده‌روازه‌گه، له‌وه‌ختيگ ك كازم محه‌مه‌د بريسه‌م عقابى سه‌رۆك ده‌سه‌ى ده‌روازه‌يل مه‌رزێ ئاماده‌يى ده‌روازه‌گه ئه‌را چگن گه‌شتياره‌يل و ئاڵشت وئولشت بازرگانى نيشاندا.
جى باسه، حكومه‌ت عراقى له نۆڤه‌مبه‌ر/ ته‌شرين دويه‌م 2017 تويه‌نست شار قائم له پاريزگاى ئه‌نبار له خوه‌رئاواى وڵاته‌گه له‌ژير ده‌سڵات ريكخرياگ تيرۆريستى داعش بارێده‌و ك شان وه‌شان شاروچكه‌ى ئه‌لبوكه‌مال سوورييه.
