شەفەق نیوز/ فراکسیۆن '' هێزە عراقیەگان'' ئمڕوو پەنجشەممە، باس گامەیل موستەفا کازمی سەرۆک وەزیرەیل فەرماندەی گشتی هێزە چەکدارەگان کرد لە شەرمۆکانەی گیرهاوردن چەک وەدەس دەوڵەت، هەمیش وەجینەهاوردن بەرنامە حکومەتیەگەی ک ئامادەی کردگە.
رەعەد دەهلەگی وەرپرس فراکسیۆنەگە ئەرا ئاژانس شەفەق نیوز وت: سەرۆک وەزیران بۆچون ئاشکرایگ دیرێد ئەرا هاوردنەوەی دەوڵەت دامەزراوەیل، وەلی رەیەگە لەنوای ئاڵوزە، و خەریکە لە گێڵگەی مین ریکەێد ئەرا هاوردنه‌وه‌ی دەوڵەت دامەزراوەیل.
وتیش: کازمی نێەکەفێدە ژیر جەخت سایسی و حزبی، و هاوبەش ئەوەکان نەوی لە باوەتە ئەمنیەگە، وەپێچەوانەی ئەو حکومەتەگان، ک گشتی کوڵبڕکردیان ئەرا یەک پێکهاتە لە بان بەرژەوەنی ئەو پێکهاتەگان، ولە خود وەختەگە داوا لە سەرۆک وەزیران کرد ئەرا خاسەوکردن هەڵە ورینەگان، و نەوسیەێد وەل یەک لایەن لەبان بەرژەوەنی لایەنیگ تر.
دەهلەگی هەمیش وت: گامەیل کازمی وەرەو گیرهاوردن چەک وەدەس دەوڵەت شەرموکانەس و ده‌لیری فرەتریگ خوازێد، هەمیش لە بەڕنامە حکومەتیەگەی هیچ گامیگ نەیمن تەنیا راگەیانن، و ئیمە رەوشەگە فامستیمنە و ئاست جەختەگان ک لەبان سەرۆک وەزیران تێرنەی، لە هەمان وەخت خوەی دەرفەتیگ ئەرا رزگارکردن عراق دیرێد، ئەگەر شکست هاورد لە ئاوەدان کردن دەوڵەت دامەزراوەیل، نا دەوڵەتی زاڵەو بوود، و ئەویش مەترسی لە بان عراق و ناوچەگە دروس کەێد.
کازمی ئووشێد: ئی حکومەتە ک خوەی سەرۆکایەتیی کەێد وەختانەیە، و ئامادەکارە ئەرا هەڵبژاردن زوینە، بەڵکم لە خود وەختەگە بڕیگ پەیمان دا لە وەخت وەرگردن پۆستەگەی، لەلیان گیرهاوردن چەک وەدەس دەوڵەت، و وەشوون کەفتن بکوشەیل خۆپیشاندەرەیل، هەمیش سزاداین گەندەڵەیل، و خاسەوکردن رەوش خزمەتگوزاری و ژیان و گوزران.