شه‌فه‌ق نيوز/ ليوا روكن غه‌سان خالد عزى فه‌رمانده‌ى فه‌رمانده‌يى دياله‌، مه‌سه‌له‌ى "حه‌وز  وه‌قف" له‌ باكوور خوه‌رهه‌ڵات باقووبه‌ و ئه‌و رويداگه‌يله‌ ك له‌تى كه‌فتنه‌سه‌و مه‌سه‌له‌يگه‌ عه‌شايرى ته‌واو، باس له‌وه‌يش كرد هويچ ناوچه‌يگ نيه‌ له‌ دياله‌ له‌ده‌يشت ده‌سڵات هيزه‌يل ئه‌منى.

عزى ئه‌را شه‌فه‌ق نيوز وت: ئه‌وه‌گ له‌ حه‌وز وه‌قف له‌ باكوور خوه‌رهه‌ڵات باقووبه‌ كه‌فته‌سه‌و له‌ رويداگه‌يل ئه‌منى، رويداگه‌يليگن له‌باره‌ى ناكووكيه‌يل عه‌شايرى و وجوود چه‌كه‌يليگ بى مووڵه‌ت له‌لاى بڕيگ له‌ عه‌شايره‌يل و له‌ حاڵ حازريش فه‌رمانده‌يى دياله‌ وه‌رده‌وامه‌ ئه‌را زه‌فتكردن ئه‌و چه‌كه‌يله‌ ك مووڵه‌ت نه‌يرن له‌ گشت ناوچه‌يل دياله‌.

جى باسه‌، عزى هه‌ميش وت: ديداره‌يل وه‌رده‌وام و هه‌ماهه‌نگى به‌رزيگ ديريم وه‌ل گشت عه‌شاير له‌ ناوچه‌يل پاريزگاگه‌ ئه‌را كووتاييهاوردن وه‌ هه‌ر ناكووكييگ ك ئاشتيانه‌ى كۆمه‌ڵگا شيونێد و داوايش له‌ عه‌شاير و هاووڵاتيه‌يل كرد هاوكارى هيزه‌يل ئه‌منى بكه‌ن ئه‌را نه‌هيشتن چه‌ك و ريگرتن له‌ هه‌ر كه‌سه‌يليگ هه‌وڵ شيوانن ئارامى و ئاسايش پاريزگاگه‌ ئه‌ياد.