"كۆرۆنا" رێ له هاوردن كاره‌باى كه‌نداو ئه‌را عراق گرت و روێ له دو وڵات هاوسا كريه‌ێد
شه‌فه‌ق نيوز/ وه‌زاره‌ت كاره‌باى عراق، ئاشكراى ده‌رئه‌نجامه‌يل تازه‌ى ڤايرۆس كۆرۆنا كرد ك كاريگه‌رى خسته‌سه بان هه‌ڵكه‌فت هاوردن كاره‌با له وڵاته‌يله‌و، باس له‌وه‌يش كرد بارودوخ ته‌ندروستى بويه‌سه هووكار دوياكه‌فتن وه‌پيداين عراق وه 500 ميگاوات له ئه‌نجومه‌ن هاريكارى كه‌نداوه‌و، ئاماژه وه‌يه‌يش كرد ك له‌ى باوه‌ته‌و روێ له ئوردن و توركيا ئه‌كريه‌ێد.
له‌ى باوه‌ته‌و، ئه‌حمه‌د موسا عه‌بادى قسه‌كه‌ر فه‌رمى وه‌زاره‌ته‌گه ئه‌را ئاژانس شه‌فه‌ق نيوز وت: عراق ريككه‌فتن زويتر داشتگه وه‌ل ده‌سه‌ى په‌يوه‌سكردن كه‌نداو ئه‌را په‌يوه‌سكردن كاره‌با وه ئه‌نجومه‌ن هاريكارى كه‌نداو، ك قۆناغ يه‌كه‌م ئه‌و ريككه‌فتنه وه‌پيداين كاره‌با وه عراق ئه‌گرێده خوه‌ى له مانگ ته‌شرين يه‌كه‌م له ئمساڵ وه 500 ميگاوات ئه‌را پاريزگايه‌يل باشوور.
عبادى وت: ده‌رئه‌نجامه‌يل بارودوخ ته‌ندروستى و قه‌يران ئابوورى جيوه‌جيكردن ئه‌و ريككه‌فتنه دوياخستگه ئه‌را وه‌خته‌يل تر و وه‌زاره‌ته‌گه‌يش روێ له ئمزاكردن ريككه‌فتنيگ تر كردگه وه‌ل ده‌وڵه‌ته‌يل هاوسا له‌وانه‌يش ئوردن و توركيا ئه‌را هاوردن كاره‌با.
