شەفەق نیوز/ وەڕیەوبەرایەتی زانیاری ئەنبار، ئمڕوو دووشەممە، ئاشکراکرد لە وردەکاری وەخوەوی ئاشکراکردن ئەندامیگ لە داعش، ک زانیاری لەبان هاووڵاتیەیل دیاد وبیادە هووکار لە رفانن وکوشتنیان، لەناویان یەک مەدەنییگە بریا ئەرا مردن لە بیاوان روتبە لە پارێزگای ئەنبار.
وەڕیەوبەرایەتیەگە لە بایاننامەیگ ك رەسیە ئاژانس شەفەق نیوز وت؛ تومەتباریگ وەناو ( حوسام عەبسی فازڵ جەبر عیساوی) دانیشتو روتبە، وەزوان خوەی ئاشکراکرد ک سەرەو داعش تیرۆرستە، وشیوەی ( ئەمنی) ، ک زانیاریەگان گردەو کردیاد لەبان هاووڵاتیەیل هاوکار وەل دەزگا ئەمنیەگان، وخەوەر دیادە داعشەیل تا بڕفننەیان، لەلیان ( قەحتان محمد عەباس جاسم عیساوی) بوی، ک رفیا وکوشیا لە بیاوان روتبە.
وتیش؛ چیمنە وردەکاری لە لیکۆڵینەوە وەل تومەتبار ( حوسام عەبسی ) ک ئاشکرای وردەکاریەگان کرد لە چوونیەتی رفانن ( قەحتان محمد) و بردنی ئەرا بیاوان روتبە و کوشتنی.
وەڕیەوبەرایەتیەگە دیاری کرد؛ باوەتەگە خریا وەردەس دادوەر لێکۆڵینەوەی ناوەندی ئەنبار، و تیم کار و گواستنەوە دروس کریا، وەبەڵگەی تومەتبارەگە، ولەمەوقەی رەسین ئەرا ئاوای موعتەدلە له‌ بیاوان روتبە، تومەتبارەگە ده‌سنیشان شوین وەخاک ناین تەرم کوشیاگە کرد، ودویای چال کەنین تەرمەگە دیارکەفت.
هەمیش وت؛ لەبنەمای چەودێری وەردەوام ئەرا قەزای روتبە و بیاوانەگەی لە خوەرئاوای پارێزگاگە، و گورج کردن رەنج هەواڵگیری، ئەرا چەودێری شانەەیل سەروە ریخریاگ داعش، لە ئۆپراسیۆنیگ زانیاری، دەسوەسەر دووان لە چەتەیل داعش کریا، ک وەگورەی یاسای چوار تیرۆرست داوا کریانە.
جی باسە ک دەزگا ئەمنیەگان لە پارێزگای ئەنبار، هەر ماوەیگ جاری خه‌وه‌ر لە دەوەسەرکردن کەسەیل سەروە داعش ده‌ن، ک دەوریگ رانینە لە ئەو پەلامارە تیرۆرستیەیلە ک ریخریاگەگە لە پارێزگاگە لەوەخت کۆنتڕۆڵ کردنی وەجیهاوردگە.